سرحدپار2افراد ہلاک ،خاتون سمیت 2زخمی ہوئے :پاکستانی دفتر خارجہ
جے کے این ایس
سرینگر؍؍ہند۔پاک افواج کے درمیان راجوری سیکٹر میں شدید گولہ باری پاکستانی زیر انتظام کشمیرمیں دو شہری ہلاک ۔ دفتر خارجہ کے مطابق پاکستانی زیر انتظام کشمیر کے علاقے بھمبر میں 2 افراد ہلاک جبکہ ایک خاتون اور ان کا جواں سالہ بیٹا زخمی ہوگیا۔جے کے این ایس کے مطابق پاکستانی دفتر خارجہ کی جانب سے جاری کئے گئے بیان میں کہا گیا ہے کہ بارڈر سیکورٹی فورسز نے کنٹرول لائن پر شدید گولہ باری کی جس کے نتیجے میں پاکستانی زیر انتظام کشمیر میں دو شہری جاں بحق ہوئے۔ ڈپٹی کمشنر ضلع بھمبر چوہدری گفتار کا کہنا تھا کہ چامب سیکٹر میں بھارت کی جانب سے صبح 6 بجے سے شیلنگ کی جارہی ہے اور ابتدائی رپورٹس کے مطابق 2 شہری ہلاک اور 2 زخمی ہوئے ہیں۔چامب سیکٹر، بھمبر ضلع کے برنالا تحصیل میں واقع ہے جو ا?زاد جموں و کشمیر کا جنوبی علاقہ ہے۔ڈپٹی کمشنر کا کہنا تھا کہ متاثرہ علاقے میں موبائل فون کی سہولت دستیاب نہیں ہے جس کی وجہ سے نقصان کی معلومات حاصل کرنے میں دشواری کا سامنا ہے اور اس حوالے سے ٹھوس اطلاعات فائرنگ کے رکنے کے بعد وہاں کا دورہ کرکے ہی مل سکیں گی۔برنالا میں مقیم ریوینیو ڈپارٹمنٹ کی ملازم سیماب عالم نے مقتول کی شناخت رفیق اور وزیر کے نام سے کی۔بھارتی گولیوں سے زخمی ہونے والوں کی شناخت جنت بی بی اور محمد عثمان کے نام سے کی گئی۔زیر انتظام کشمیر کے وزیر منصوبہ بندی و ترقی وقار احمد نور جو اس ہی وقت برنالا سے واپس آئے تھے، نے جنگ بندی معاہدے کی خلاف ورزی کی مذمت کی جس میں معصوم شہریوں کو نشانہ بنایا گیا۔انہوں نے برنالا کے تحصیل ہسپتال میں ڈان سے بات کرتے ہوئے بتایا کہ بھارتی حکومت لائن ا?ف کنٹرول پر کشیدگی بڑھا کر وہاں اپنی سیاسی ضروریات کو پورا کرنا چاہتی ہے۔خیال رہے کہ زخمی جنت بی بی بھی اسی ہسپتال میں زیر علاج ہیں جبکہ ان کے بیٹے عثمان کی حالت نازک ہونے کی وجہ سے انہیں ضلعی ہیڈکوارٹر ہسپتال بھمبر منتقل کردیا گیا ہے
