اسرائیل 42 فلسطینی قیدیوں کو رہا کرے گا، دوسری کھیپ میں حماس کے 14 اسرائیلی یرغمال ہیں
یواین آئی
غزہ:خان یونس؍؍ مقبوضہ فلسطین کی مزاحمتی تنظیم حماس کے عسکری ونگ القسام بریگیڈز نے 7 اکتوبر کو یرغمال بنائے گئے 24 یرغمالیوں کو رہا کردیا جبکہ جواب میں اسرائیل نے اپنی جیلوں میں قید 39 فلسطینی بچوں اور خواتین کو آزاد کردیا۔مقبوضہ فلسطین کے محصور علاقے غزہ میں اسرائیل اور حماس کے درمیان طے پانے والے معاہدے کے تحت 4 روزہ جنگ بندی کا آج باقاعدہ آغاز ہوگیا۔عارضی جنگ بندی کا آغاز مقامی وقت کے مطابق صبح 7 بجے ہوا ہے جو اگلے 4 روز یعنی منگل کی صبح 7 بجے تک جاری رہے گا۔جنگ بندی کے دوران اسرائیل حماس معاہدے کے تحت قیدیوں کا تبادلہ کیا جانا ہے۔ماس کے عسکری ونگ القسام بریگیڈز کے ترجمان ابو عبیدہ نے کہا ہے کہ تھائی لینڈ کے شہریوں سمیت 24 اسرائیلی یرغمالیوں کو رہا کردیا ہے۔حماس کے حمایتی سمجھے جانے والے فلسطینی نشریاتی ادارے نے بتایاکہ القسام بریگیڈز نے یرغمالیوں کو ریڈ کراس کے حوالے کیا جس کے بعد ریڈکراس نے انہیں مصر کے حوالے کردیا ہے۔قطری وزارت خارجہ کے ترجمان کے مطابق القسام کی قید سے رہائی پانے والوں میں دہری شہریت کے حامل افراد سمیت 13 اسرائیلی، 10 تھائی اور ایک فلپائن کا شہری شامل ہے۔اسرائیلی میڈیا کے مطابق اسرائیلی سکیورٹی اہلکار نے بھی حماس کی جانب سے 13 یرغمالیوں کی رہائی کی تصدیق کی ہے۔اسرائیلی میڈیا کے مطابق یرغمالیوں کو بذریعہ ہیلی کاپٹر مقبوضہ تل ابیب کے مضافات میں قائم شنائیڈر اسپتال منتقل کیا جائے گا۔وہیں اسرائیلی ریڈیو نے کہا ہے کہ ابتدائی طبی معائنے میں تمام یرغمالیوں کو صحت مند قرار دیا گیا۔حماس کی جانب سے اسرائیلی قیدیوں کی رہائی کے بعد قابض فوج نے بھی 39 فلسطینی قیدی خواتین اور بچوں کو رہا کردیا۔فلسطینی قیدیوں کو اسرائیل کی مختلف جیلوں سے عوفر جیل منتقل کیا گیا جہاں سے 24 فلسطینی خواتین اور 15 بچوں کو اسرائیلی حکام رہا کرتے ہوئے ریڈ کراس کے حوالے کیا۔رہا ہونے والے فلسطینی قیدیوں کا تعلق مقبوضہ بیت المقدس اور مقبوضہ مغربی کنارے سے ہے۔قطری وزارت خارجہ کے ترجمان نے اسرائیل کی جانب سے 39 فلسطینی خواتین اور بچوں کی رہائی کی تصدیق کی ہے۔خیال رہے کہ قیدیوں کے تبادلے کی ڈیل کے تحت اسرائیل ہر یرغمالی کی رہائی کے بدلے 3 فلسطینی قیدیوں کو رہا کرے گا۔جبکہ حماس اور اسرائیل کے درمیان ہفتہ کو چار روزہ جنگ بندی کے دوران تبادلے کے دوسرے بیچ میں اسرائیل کی طرف سے 42 فلسطینی قیدیوں کی رہائی کے بدلے حماس 14 اسرائیلی یرغمالیوں کو رہا کرے گی۔مصر کے ایک سینئر عہدیدار نے یہ اطلاع دی۔ اس معاہدے کے تحت اسرائیلی جیلوں میں قید 42 فلسطینیوں کو بھی رہا کیا جا رہا ہے جن میں 18 خواتین اور 24 لڑکے شامل ہیں۔اہلکار نے نام ظاہر نہ کرنے کی شرط پر کہا کہ وہ جاری مذاکرات کی تفصیلات کے بارے میں بات کرنے کا مجاز نہیں ہے۔ انہوں نے کہا کہ ثالث مصر اور قطر نے اسرائیل کو حماس کے ہاتھوں یرغمال بنائے گئے افراد کی فہرست دی ہے جنہیں رہا کیا جانا ہے۔جنگ بندی کے پہلے روز جمعہ کو 63 قیدیوں اور یرغمالیوں کو رہا کر دیا گیا۔ آنے والا تبادلہ اس وقت ہوا جب حماس نے کل 7 اکتوبر کو اسرائیل پر حملے کے دوران یرغمال بنائے گئے تقریباً 240 میں سے 24 کو رہا کیا۔ بدلے میں اسرائیل نے 39 فلسطینیوں کو جیلوں سے رہا کر دیا ہے۔غزہ کی قید سے آزاد ہونے والوں میں 13 اسرائیلی، 10 تھائی شہری اور ایک فلپائنی شہری شامل ہے۔حماس نے جنگ بندی کے دوران 50 یرغمالیوں کو رہا کرنے کا وعدہ کیا ہے جبکہ اسرائیل 150 فلسطینی یرغمالیوں کو رہا کرے گا۔ قطر کی وزارت خارجہ کے ترجمان ماجد الانصاری نے کہا کہ دونوں فریقوں نے رہا کیے جانے والے یرغمالیوں کی فہرستیں جاری کر دی ہیں۔اسرائیل نے رہائی کے اہل 300 قیدیوں کی فہرست بھی شائع کی ہے۔
