ہر پہلے سمسٹر کا طالب علم ایک درخت لگائے گا اور اپنے دو سالہ کورس کے دوران اس کی پرورش کا عہد کرے گا
لازوال ڈیسک
بھدرواہ؍؍ جموں کے بھدرواہ کیمپس یونیورسٹی کے انسٹی ٹیوٹ آف ماؤنٹین انوائرمنٹ کے شعبہ جغرافیہ نے ایک شجر کاری مہم کا انعقاد کرکے عالمی یوم ماحولیات منایا۔ اس تقریب میں پودے لگانے والے طلباء اور اساتذہ دونوں کی پرجوش شرکت دیکھنے میں آئی۔اس خصوصی موقع کی مناسبت سے شعبہ نے ایک نیا آغاز کیا جس میں ہر پہلے سمسٹر کا طالب علم ایک درخت لگائے گا اور اپنے دو سالہ کورس کے دوران اس کی پرورش کا عہد کرے گا۔ اس اقدام کی سربراہی ڈاکٹر چھیرنگ ٹنڈپ، انچارج ہیڈ آف دی کر رہے ہیں جہاںشعبہ جغرافیہ کو بھدرواہ کیمپس کے ریکٹر پروفیسر جے پی سنگھ جوریل کی حمایت حاصل ہے۔
اس موقع پرریکٹر بھدرواہ کیمپس پروفیسر جے پی سنگھ جوریل نے شعبہ جغرافیہ کے طلباء اور فیکلٹی کو ان کی فعال کوششوں پر مبارکباد دی۔ انہوں نے درخت کی اہم اہمیت پر زور دیااورکہا کہ شجرکاری وقت کی ضرورت ہے۔انہوں نے مزیدکہاکہ یہ اقدام نہ صرف ہمارے کیمپس کو خوبصورت بنائے گا بلکہ ماحولیاتی چیلنجوں کو کم کرنے میں بھی اہم کردار ادا کرے گا۔
وہیںریکٹر بھدرواہ کیمپس نے مزید کہا کہ اس تقریب نے بھدرواہ کیمپس کمیونٹی کے ایک سرسبز اور پائیدار ماحول کو فروغ دینے کے اجتماعی عزم کو اجاگر کیا۔ انہوں نے مزید کہا کہ شعبہ جغرافیہ کی جاری کوششیں دیگر محکمہ جات اور اداروں کے لیے اسی طرح کے ماحولیات کے حوالے سے شعوری اقدامات کرنے کے لیے ایک تحریک کا کام کریں گی۔وہیںڈاکٹر چھیرنگ ٹنڈوپ انچارج شعبہ جغرافیہ نے اس اقدام کی اہمیت پر روشنی ڈالتے ہوئے کہاکہ ہمارا مقصد طلباء میں ماحولیاتی ذمہ داری کا احساس پیدا کرنا اور اس میں اپنا حصہ ڈالنا ہے۔
