سنگلدان گول میں زمین دھنسنے سے چار مکانات مکمل طور پر تباہ ، ادھم پورہ میں فٹ برج بہہ گیا
پسیاں گر آنے کے بعد کئی علاقوں کا رابطہ منقطع ، درجنوں کنبے محفوظ مقامات پر منتقل
لازوال ڈیسک
سرینگر؍؍جموں کے کئی علاقوں میںمسلسل بارشوں کی وجہ سے کافی نقصان ہو گیا ہے ۔ موسلادار بارشوں کے نتیجے میں ادھم پورہ میں فٹ برج بہہ گیا ہے جس کے نتیجے میں 5000سے زائد افراد پر مشتمل آبادی متاثر ہو گئی ہے ۔ ادھر شدید بارش کی وجہ سے کچا مکان منہدم ہونے سے ایک خاتون کی موت ہو گئی جبکہ رام بن ضلع کے گول کے سنگلدان علاقے میں زمین دھنسنے سے چار مکانات مکمل طور پر تباہ ہو گئے۔ سی این آئی کے مطابق جموں کے ادھم پورہ علاقے میں مسلسل بارشو ں نے تباہی مچا دی ہے ۔ شدید بارش کی وجہ سے اس کا کچا مکان منہدم ہونے سے ایک خاتون کی موت ہو گئی۔ حکام نے بتایا کہ شدید بارش کی وجہ سے ادھم پور ضلع کے رام نگر علاقے میں ایک کچا مکان گر گیا، جس میں ایک خاتون کی موت ہو گئی اور تین دیگر کو بحفاظت باہر نکلا گیا ۔ انہوں نے کہا کہ مکان گر جانے کے بعد وہاں علاقے میں بچائو آپریشن شروع کر دیا گیا جس دوران ملبے سے خاتون کی نعش بر آمد کر لی گئی ۔ذرائع نے بتایا کہ ڈوڈہ، کشتواڑ، رام بن ، ادھم پور، کٹھوعہ، سانبہ، پونچھ، ریاسی، جموں اور راجوری اضلاع میں شدید بارش سے سیلاب صورتحال پیدا ہوئی ہے ۔ حکام نے بتایا کہ رام بن ضلع کے گول کے سنگلدان علاقے میں زمین دھنسنے سے چار مکانات مکمل طور پر تباہ ہو گئے، ایک فٹ پل طوفانی سیلاب میں بہہ گیا۔ انہوں نے مزید کہا کہ جموں خطہ کے کئی اضلاع میں آج شدید بارش ہوئی جس سے بڑے پیمانے پر نقصان ہوا ہے۔ ڈوڈہ کے گندوہ علاقے میں طوفانی بارش میں ایک فٹ برج بہہ گیا اور رام نگر علاقے میں ایک مکان کی چھت گر گئی۔ذرائع نے بتایا کہ راجوری کے بدھل علاقے کو ریاسی کے مہور سے جوڑنے والی ایک لنک سڑک چسانہ کے علاقے میں شدید بارش کے بعد ایک بڑے لینڈ سلائیڈنگ کی وجہ سے بند ہوگئی۔حکام نے بتایا کہ ڈوڈہ میں گندوہ کے کلجوگاسر علاقے میں ایک فٹ برج اچانک سیلاب میں بہہ گیا۔ ذرائع نے مزید کہا کہ اس کے ساتھ کم از کم تین گاؤں اور چار بستیوں سے رابطہ منقطع ہو گیا ہے۔ریاسی ضلع کے دور افتادہ چسانہ علاقے میں ایک بڑا لینڈ سلائیڈنگ ہوا جس سے راجوری، بدھل۔ ریاسی روڈ بلاک ہو گیا۔ذرائع نے بتایا کہ ایک ایڈوائزری جاری کی گئی ہے جس میں لوگوں سے کہا گیا ہے کہ وہ سڑک کے بحال ہونے تک اس پر سفر نہ کریں۔یہ سڑک راجوری کو ریاسی اور رام بن اضلاع کے ساتھ مہورے اور گول کے علاقوں سے جوڑتی ہے۔ادھر نما ئندے نے رام بن سے تفصیلات فراہم کرتے ہوئے بتایا کہ رام بن ضلع کے گول سب ڈویژن کے سنگلدان علاقے تتاپانی میں زمین دھنسنے سے چار رہائشی مکانات کو نقصان پہنچا ہے۔ذرائع نے بتایا کہ تتاپانی، سنگلدان میں کل رات ہونے والی بارش کے بعد لینڈ سلائیڈنگ ہوئی جس کی وجہ سے چار رہائشی مکانات کو نقصان پہنچا۔ان کا کہنا تھا کہ تمام قیدیوں کو محفوظ مقامات پر منتقل کر دیا گیا ہے اور متاثرہ خاندانوں کو خیمے فراہم کیے گئے ہیں۔
