نیٹ جیسے باوقار امتحانات کی سالمیت اور شفافیت کے تحفظ کے لیے فول پروف پالیسی کا مطالبہ کیا
لازوال ڈیسک
جموں؍؍ جموں و کشمیر نیشنل کانفرنس (جے کے این سی) جموں کے صوبائی صدر رتن لال گپتا نے موجودہ حکومت پر تمام محاذوں پر ناکام ہونے کا الزام عائد کرتے ہوئے اس پر کڑی تنقید کی ہے۔ انہوں نے نوجوانوں کی حالت زار پر روشنی ڈالتے ہوئے کہا کہ قوم کا مستقبل ہونے کے باوجود وہ موجودہ دور حکومت میں شدید متاثر ہوئے ہیں۔سینئر این سی لیڈر شیر کشمیر بھون میں منعقدہ شمولیتی پروگرام کے دوران بول رہے تھے جس میں گرومیت سنگھ، بی جے پی کے ریاستی سکریٹری اقلیتی مورچہ نے اپنے حامیوں کے ساتھ رتن لال گپتا اور دیگر این سی قائدین کی موجودگی میں پارٹی میں شمولیت اختیار کی۔وہیں شمولیتی پروگرام کا اہتمام سردار تیجندر پال سنگھ (امن)، ضلع صدر جموں اربن وائی این سی نے کیا تھا۔تاہم پارٹی میں شامل ہونے والوں میں اجے کمار، سچن کمار، اشونی بھگت، آدتیہ، گگن عتری اور دیگر شامل تھے۔
اس موقع پرپارٹی کارکنوں سے خطاب کرتے ہوئے رتن لال گپتا نے بڑھتی ہوئی بے روزگاری اور مختلف گھوٹالوں پر تشویش کا اظہار کیا، بشمول بھرتی گھوٹالے، این ای ای ٹی اسکام، اور یو جی سی امتحانات کی منسوخی، جس نے نوجوانوں کو مایوس کر دیا ہے۔ انہوں نے کہا کہ مرکز کی بی جے پی حکومت ہماری نوجوان نسل کے مستقبل سے کھیل رہی ہے۔ انہوں نے ایسے اہم امتحانات میں ہیرا پھیری کرکے ہمارے نوجوانوں کے مستقبل کو خطرے میں ڈالنے والے ذمہ داروں کی نشاندہی اور جوابدہی کی فوری ضرورت پر زور دیا۔
رتن لال گپتا نے نیٹجیسے باوقار امتحانات کی سالمیت اور شفافیت کے تحفظ کے لیے ایک فول پروف پالیسی کا مطالبہ کیا۔ انہوں نے زور دے کر کہا کہ اس طرح کے اقدامات اس بات کو یقینی بنانے کے لیے ناگزیر ہیں کہ ہمارے نوجوانوں کی خواہشات، جو ہماری قوم کے مستقبل کی نمائندگی کرتے ہیں، پر کسی بھی صورت میں سمجھوتہ نہ کیا جائے۔ انہوں نے کہا کہ نوجوان پارٹی میں ریڑھ کی ہڈی کی حیثیت رکھتے ہیں اور موجودہ صورتحال انتہائی تشویشناک ہے کیونکہ حکومت کے پاس نوجوانوں کے لیے کوئی پالیسی نہیں ہے جس کے نتیجے میں ملک بھر میں بے روزگاری عروج پر ہے۔اس موقع پر انہوں نے پارٹی میں نئے شامل ہونے والوں کا خیر مقدم کیا ۔
