نٹرنگ نے 1990 میں جموں میں چلڈرن تھیٹر متعارف کروایا تھا
لازوال ڈیسک
جموں؍؍ نامور تھیٹر ڈائریکٹر پدم شری بلونت ٹھاکر جو ہندوستانی تھیٹر کے جادوئی آدمی کے طور پر بھی جانے جاتے ہیں، نے آج نٹرنگ اسٹوڈیو تھیٹر میں بچوں کے ساتھ ایک خصوصی تھیٹر ورکشاپ کا انعقاد کیا۔وہیں تھیٹر کو شخصیات کو تبدیل کرنے کا حتمی فن قرار دیتے ہوئے انہوں نے اسکولوں اور کالجوں کے ذریعہ اس جادوئی فن کے زیادہ سے زیادہ استعمال پر زور دیا۔انہوں نے کہاکہ تھیٹر کا فن ایک بچے کو ناقابل یقین غیر معمولی صلاحیتوں کے ساتھ بااختیار بناتا ہے۔یاد رہے نٹرنگ نے 1990 میں جموں میں چلڈرن تھیٹر متعارف کروایا تھا اور آج تک نٹرنگ کے چلڈرن تھیٹر کے اقدامات نے ہزاروں نوجوانوں کی قسمت بدل دی ہے۔ نٹرنگ فخر کے ساتھ یہ دعویٰ کر سکتا ہے کہ جموں کے نوجوانوں کی اکثریت ہمارے منفرد تھیٹر تربیتی اقدامات کی پیداوار ہے۔دریں اثناء ہر سال نٹرنگ بچوں کے لیے تین ورکشاپس کا انعقاد کرتا ہے جس میں ‘سمر تھیٹر کیمپ’، ‘ونٹر تھیٹر ورکشاپ’ اور ‘اسپرنگ تھیٹر ورکشاپ’ شامل ہیں۔اس ضمن میں بلونت ٹھاکر نے انسانی تبدیلی اور نشوونما کی جدید ترین تکنیکوں کا استعمال کرتے ہوئے بچوں کے لیے ایک نیا تربیتی طریقہ کار تیار کیا ہے۔نٹرنگ اس وقت بچوں کا 15 روزہ موسم سرما کے تھیٹر کیمپ کا انعقاد کر رہا ہے جس کا اختتام بلونت ٹھاکر کے تحریر کردہ اور ہدایت کاری والے ڈرامے ‘رنگ بدلتی دنیا’ کی پیش کش کے ساتھ ہوگا۔
