سرکردہ لیڈر چھگن بھجبل، پرفل پٹیل، دلیپ والسے پاٹل، حسن مشرف اور دھننجے منڈے بھی کابینہ میں شامل
یواین آئی
ممبئی؍؍مہاراشٹر میں ایک بڑی سیاسی پیش رفت کے تحت، نیشنلسٹ کانگریس پارٹی (این سی پی) کے متعدد سرکردہ لیڈروں بشمول سینئر لیڈر اجیت پوار کو اتوار کے روز ایکناتھ شندے کی کابینہ میں شامل کیا گیا۔پارٹی کے سربراہ شرد پوار کے بھتیجے اجیت پوار کو نائب وزیر اعلیٰ بنایا گیا، جس میں پارٹی کے سرکردہ لیڈروں بشمول چھگن بھجبل، پرفل پٹیل، دلیپ والسے پاٹل، حسن مشرف اور دھننجے منڈے کو بھی کابینہ میں شامل کیا گیا۔اس سے پہلے مسٹر اجیت پوار 29 ایم ایل اے کے ساتھ راج بھون پہنچے تھے۔ذرائع نے بتایا کہ سینئر لیڈر شرد پوار پارٹی میں ہونے اس افراتفری سے ناراض ہیں اور انہوں نے اپنے بھتیجے کی حمایت نہیں کی ہے۔ا نیشنلسٹ کانگریس پارٹی (این سی پی) نے اتوار کے روز مسٹر اجیت پوار اور دیگر سینئر لیڈروں کی ایکناتھ شندے کی حکومت میں بطور وزیر حلف برداری کو بھارتیہ جنتا پارٹی (بی جے پی) کے ‘آپریشن لوٹس’ کا حصہ قرار دیا۔آج یہاں اپنے بیان میں این سی پی کے ترجمان مہیش تاپسے نے کہا کہ تمام لیڈران، ضلع صدر اور کارکنان پارٹی سربراہ شرد پوار کے ساتھ ہیں۔ انہوں نے کہا، ‘‘حلف برداری کی تقریب کو پارٹی کی طرف سے رسمی حمایت نہیں دی گئی ہے۔ یہ ‘آپریشن لوٹس’ کا حصہ ہے۔ کچھ لیڈروں نے ذاتی طور پر حلف لیا ہے۔”واضح رہے کہ مہاراشٹر کی سیاست میں یہ پیشرفت اس وقت سامنے آئی جب مسٹر اجیت پوار کو پارٹی میں کنارے کر دیا گیا تھا اور این سی پی سپریمو کی بیٹی سپریا سولے کو پارٹی کا کارگزار صدر بنایا گیا۔
