جموں و کشمیر مشترکہ مسابقتی امتحان 2023
کامیاب امیدواروں کی فہرست اور طبی معائنہ کا اعلان
جان محمد
جموں:جموں و کشمیر پبلک سروس کمیشن (JKPSC) نے 2023 کے مشترکہ مسابقتی امتحان کے نتائج کا اعلان کر دیا ہے اور کامیاب امیدواروں کو طبی معائنہ کے لیے منتخب کیا گیا ہے۔ اس امتحان کے لیے کل 75 آسامیوں کا اعلان کیا گیا تھا، جس کے لیے 30,756 امیدواروں نے درخواست دی۔ 15 اکتوبر 2023 کو منعقدہ ابتدائی امتحان میں 18,882 امیدواروں نے حصہ لیا، جن میں سے 2,144 کو مین امتحان کے لیے اہل قرار دیا گیا۔
مین امتحان اور انٹرویو کا مرحلہ
مین امتحان 26 مارچ سے 3 اپریل 2024 تک جموں اور سری نگر میں منعقد ہوا، جس میں 1,296 امیدواروں نے تمام پرچوں میں شرکت کی۔ میرٹ اور کارکردگی کی بنیاد پر 274 امیدواروں کو انٹرویو کے لیے مدعو کیا گیا، جس کا انعقاد 21 اکتوبر سے 29 اکتوبر 2024 کے درمیان کیا گیا۔ انٹرویو میں بہترین کارکردگی کا مظاہرہ کرنے والے 71 امیدواروں کو حتمی طور پر منتخب کیا گیا، جنہیں اب طبی معائنہ کے لیے بھیجا جائے گا۔
