کہا حکومتی احکامات کی دھجیاں اڑائی جا رہی ہیں ،بچوں کی زندگیاں خطرات سے خالی نہیں
لازوال ڈیسک
جموں؍؍ پیرنٹس ایسوسی ایشن جموں کے صدر امیت کپور نے کہا ہے کہ یکم جون سے گرمیوں کی تعطیلات کے حکومتی حکم کے باوجود کچھ پرائیویٹ اسکول حکومتی حکم کی خلاف ورزی کرتے ہوئے اپنے اسکول کھول رہے ہیں اور ان کا کہنا ہے کہ ہم حکومت کے اس حکم پر عمل نہیں کرتے۔ امیت کپور نے کہا کہ ان اسکولوں کو صرف پیسوں میں دلچسپی ہے اور ان کا بچوں کی زندگی سے کوئی تعلق نہیں ہے۔ انہوں نے کہا کہ حکومت ایسے سکولوں کے خلاف سخت کارروائی کرے اور ان کی شناخت منسوخ کرے۔
امیت کپور نے یہ بات جموں میں ذرائع ابلاغ سے بات کرتے ہوئے کہی۔انہوں نے کہا کہ چلچلاتی گرمی کے پیش نظر حکومت نے بچوں کی حفاظت کے لیے یکم جون سے گرمیوں کی تعطیلات کا حکم جاری کیا تھا اور آج چھٹیوں کا پہلا دن تھا۔ لیکن کچھ سکول مافیا نے آج بھی حکومتی حکم کی دھجیاں اڑاتے ہوئے اپنے سکول کھول رکھے ہیں۔
انہوں نے کہا کہ ایسے سکولوں کے سربراہوںکو شرم آنی چاہیے کیونکہ انہیں شدید گرمی میں بچوں کی جان کی کوئی فکر نہیں۔ امیت کپور نے کہا کہ گرمی کی تباہ کاریوں سے ملک بھر میں ایک سو سے زائد افراد جان کی بازی ہار چکے ہیں اور اس کو مدنظر رکھتے ہوئے حکومت نے یکم جون سے جموں ڈویژن کے سکولوں میں موسم گرما کی تعطیلات کا اعلان کیا تھا تاکہ بچوں کو اس شدید گرمی میں گھروں سے باہر نکلنے سے بچایا جا سکیلیکن ان اسکول مافیا کو بچوں کی صحت سے کوئی سروکار نہیں ہے اور انہیں صرف پیسے میں دلچسپی ہے۔ امیت کپور نے لیفٹیننٹ گورنر سے مطالبہ کیا ہے کہ سرکاری حکم کی خلاف ورزی کرنے والے ایسے اسکولوں کے خلاف سخت کارروائی کی جائے اور بچوں کی صحت سے کھیلنے والے اسکولوں کی پہچان بھی منسوخ کی جائے۔
