قصورواروں کے خلاف سخت کارروائی کی جائے:سواتی مالیوال
یواین آئی
نئی دہلی؍؍دہلی خواتین کمیشن نے منگل کو دہلی پولس کے سائبر کرائم سیل کو نوٹس جاری کرکے ’کلب ہائوس‘ نامی ایپ پر مسلم خواتین کے خلاف فحش اور تضحیک آمیزتبصرہ کرنے والوں کے خلاف ایف آئی آر درج کرنے کا مطالبہ کیا ہے۔دہلی خواتین کمیشن کی چیئرپرسن سواتی مالیوال نے اس واقعے پر افسوس کا اظہار کرتے ہوئے کہاکہ کسی نے مجھے ٹوئٹر پر ٹیگ کیا اور’ کلب ہائوس‘ ایپ پرہوئی اس انتہائی فحش آڈیو گفتگو کے بارے میں بتایا، جس میں مسلم خواتین اور لڑکیوں کو نشانہ بنایا گیا اور ان کے لیے نفرت انگیز جنسی اور ہتک آمیز تبصرے کیے گئے۔انتہائی افسوسنا ک ہے کہ ملک میں ایسے واقعات میں اضافہ ہو رہا ہے۔ مجرموں کے خلاف سخت سے سخت کارروائی کی جانی چاہیے۔ اس لیے میں نے دہلی پولیس کو نوٹس جاری کیا ہے اور اس معاملے میں فوری ایف آئی آر درج کرنے اور ملزمان کی فوری گرفتاری کا مطالبہ کیا ہے۔کمیشن نے ٹوئٹر پر آن لائن پوسٹ کی گئی ایک ویڈیو کا نوٹس لیا جو کہ کلب ہائوس ایپ پر ایک غیر مہذب گفتگو کا تھا۔ مذکورہ گفتگو کی ویڈیو میں تمام شرکاء کو مسلم خواتین اور لڑکیوں کو نشانہ بناتے ،فحش اور تضحیک آمیز ریمارکس کرتے ہوئے واضح طور پر سنا جاسکتا ہے ، جسے کمیشن نے پولیس کو دے دیا۔کمیشن نے اس معاملے کا سخت نوٹس لیا اور دہلی پولیس پر زور دیا کہ وہ ملوث افراد کے خلاف فوری اور سخت کارروائی کرے۔ کمیشن نے پولیس سے کہا ہے کہ وہ فوری طور پر ایف آئی آر درج کرے اور ملزم کو جلد از جلد گرفتار کرے۔ کمیشن نیدہلی پولیس کو کی گئی کارروائی کی تفصیلی رپورٹ پیش کرنے کے لیے پانچ دنوں کا وقت دیا گیا ہے۔
