یوم اقلیتی حقوق پر بی جے پی لیڈر نے گجرات میں مختلف مقامات پر پروگراموں میں شرکت کی، حضرت شاہ عالم ؒ کی درگاہ پر حاضری بھی دی
لازوال ڈیسک
جموں؍؍بی جے پی کے قومی ایگزیکٹو ممبر اور اقلیتی امور کی وزارت کی وقف ترقیاتی کمیٹی کی چیئرپرسن ڈاکٹر درخشاں اندرابی نے آج اقلیتی حقوق کے دن کے سلسلے میں منعقدہ پروگراموں کی ایک سیریز میں شرکت کی۔ ڈاکٹر درخشاں نے آج گجرات کے تین اضلاع میں منعقدہ کئی پروگراموں میں شرکت کی جہاں انہوں نے مسلم علاقوں میں لوگوں سے ملاقاتیں کیں، کمیونٹی میٹنگوں کی صدارت کی، مزارات اور املاک کا دورہ کیا۔اس دوران ڈاکٹر درخشاں اندرابی نے احمد آباد میں حضرت شاہ عالم (رح) کے مزار پر حاضری دی اور وہاں عوامی دربار میں شرکت کی۔ ان پروگراموں کے بعد آج سہ پہر احمد آباد میں میڈیا کے نمائندوں سے بات چیت کرتے ہوئے ڈاکٹر درخشاں اندرابی نے کہا کہ اقلیتوں کا تحفظ ہمیشہ ہندوستانی ثقافت کا لازمی حصہ رہا ہے اور آزادی کے بعد بقائے باہمی کا یہ جذبہ ہمارے آئین میں بھی شامل ہے جس پر ہم فخر سے عمل کرتے رہے ہیں اور کرتے رہیں گے۔انہوں نے کہا کہ ہندوستان میں اقلیتوں کے حقوق کا تحفظ کسی دوسرے ملک کی طرح نہیں ہے۔ موصوفہ نے کہا کہ ہم ہندوستان میں لوگوں کے درمیان مذہبی یا نسلی بنیادوں پر کوئی امتیاز نہیں کرتے اور ہمارا آئین سب کے ساتھ یکساں سلوک کرتا ہے۔انہوں نے کہا کہ وزیر اعظم مودی نے اپنے گورننگ منتر ‘سب کا ساتھ، سب کا وکاس، سب کا وشواس’ کا اعلان کرتے ہوئے اس جذبے کو دہرایا اور پچھلی حکومتوں کے ذریعہ نظام میں مذہبی بنیادوں پر جو بھی امتیازی سلوک متعارف کرایا گیا تھا اسے ہٹا دیا گیا تاکہ ہندوستان میں ہمیشہ کے لئے ایک حقیقی ہم آہنگی کا ماحول پیدا کیا جاسکے۔ ڈاکٹر اندرابی نے آج پہلے گاندھی نگر میں مسلم کمیونٹی کے نمائندوں سے تبادلہ خیال کرتے ہوئے کہا کہ انہیں یہ جان کر زیادہ خوشی ہوئی کہ گجرات کی مسلم کمیونٹی نے زندگی کے ہر شعبے میں ہندوستان کے دیگر حصوں کی نسبت بہتر ترقی کی ہے۔ انہوں نے کہا کہ دیگر اقلیتوں کی طرح مسلمان بھی بی جے پی کی حکومت والی ریاستوں میں سماجی، معاشی اور تعلیمی میدانوں میں غیر بی جے پی کی حکومت والی ریاستوں کے مقابلے بہت بہتر ترقی کر رہے ہیں۔
