نئی دہلی، 17 اگست (یواین آئی) گذشتہ 24 گھنٹوں کے دوران ملک میں کورونا وائرس کے 58 ہزار سے زیادہ کیسز رپورٹ ہوئے ہیں ، جس سے متاثرہ افراد کی تعداد بڑھ کر 26.47 لاکھ سے زیادہ ہوگئی ہے جبکہ اب تک 19.19 لاکھ سے زیادہ افراد اس بیماری سے شفایاب ہوچکے ہیں۔
مرکزی وزارت صحت و خاندانی بہبود کی جانب سے پیر کے روز جاری تازہ ترین اعداد و شمار کے مطابق ملک میں ایک دن میں کورونا وائرس کے 58،525 مریضوں کے رپورٹ ہونے سے ملک میں متاثرین کی تعداد بڑھ کر 26،47،663 ہوگئی ہے۔ یہ اطمینان کی بات ہے کہ اسی عرصہ میں 57،584 افراد کی شفایابی سے صحت مند ہونے والے مریضوں کی تعداد بھی بڑھ کر 19،19،842 ہوگئی ہے۔ اسی عرصہ کے دوران 941 افراد کی ہلاکتوں سے مجموعی تعداد 50،921 تک پہنچ گئی۔ دریں اثنا، ملک میں ایکٹیو کیسز کی تعداد 544 عددکم ہو کر 6،76،900 رہ گئی ہے۔
ملک میں کورونا وائرس سے سب زیادہ متاثر ریاست مہاراشٹر ہے جہاں ایکٹیو کیسز 1986 سے بڑھ کر 1،58،705 ہوگئی اور 288 اموات کے ساتھ ہلاکتوں کی مجموعی تعداد 20،037 ہوگئی۔ اسی مدت کے دوران ریاست میں 8837 افراد شفایاب ہوئے ، جس سے صحت مند افراد کی مجموعی تعداد 4،17،123 ہوگئی۔ ملک میں سب سے زیادہ ایکٹیو کیسز اسی ریاست میں ہیں۔
