یواین آئی
نئی دہلی؍؍وزیراعظم نریندر مودی نے جمعرات کو سب سے زیادہ دن تک ملک کا اقتدار سنبھالنے والے پہلے غیرکانگریسی وزیراعظم بننے کا فخر حاصل کرلیا۔پہلے یہ حصولیابی بھارتیہ جنتا پارٹی(بی جے پی) کے بانی اٹل بہاری واجپئی کے نام تھی۔مسٹر واجپئی تین مرتبہ ملک کے وزیراعظم بنے اور اور کل ملاکر اس عہدہ پر 2,268دن تک رہے۔ مسٹر واجپئی پہلی بار 1996میں وزیراعظم بنے اور محض 13دن اس عہدہ پر رہے۔ اس کے بعد 1998میں وزیراعظم بنے اور 13مہینہ تک اقتدار سنبھالا، تیسری بار 1999میں بنے اور 2004 تک ملک کے وزیراعظم رہے۔ مسٹر واجپئی کو ملک کا پہلا غیرکانگریسی وزیراعظم ہونے کا اعزاز حاصل ہے جنہوں نے اپنی مدت کار مکمل کی۔بی جے پی نے 2014کے عام انتخابات مسٹر مودی کی قیادت میں لڑے اور پہلی بار اپنے دم پر لوک سبھا میں اکثریت کا نمبر 273سیٹیں حاصل کیں۔ تین دہائیوں میں پہلی بار کسی جماعت نے اپنے دم پر اکثریت حاصل کی تھی۔قومی جمہوری اتحاد (این ڈی اے) کے طورپر لڑئے گئے ان انتخابات کے بعد مسٹر مودی کی قیادت میں 26مئی 2014کو مرکز میں این ڈی اے کی حکومت بنی۔ 2019میں این ڈی اے نے پھر مسٹر مودی کی قیادت میں انتخابات لڑے اور پہلے سے زیادہ اکثریت حاصل کی۔ این ڈی اے نے کل ملاکر 343سیٹیں جیتیں اوربی جے پی نے اس میں تنہا 303سیٹوں پر پرچم لہرایا۔ مسٹر مودی اس بار مسلسل ساتویں مرتبہ یوم آزادی پر لال قلعہ سے قومی پرچم لہرائیں گے۔ویسے ملک میں وزیراعظم کے عہدہ پر طویل عرصہ تک رہنے کا ریکارڈ پہلے وزیراعظم پنڈت جواہر لال نہرو کے نام درج ہے۔ مسٹر نہرو 16برس 286دنوں تک ملک کے وزیراعظم رہے۔ دوسرے نمبر پر ان کی بیٹی محترمہ اندرا گاندھی ہیں جو 15برس 350دنوں تک اس عہدہ پر رہیں۔ تیسرے نمبر پر ڈاکٹر منموہن سنگھ ہیں۔گلزاری لال نندہ نے سب سے کم صرف 13دن یہ عہدہ سنبھالا۔ لال بہادر شاستری کے انتقال کے بعد وہ 11جنوری 1966سے 24جنوری 1966تک تیرہ دنوں کے لئے نگراں وزیراعظم رہے۔ اس سے پہلے جواہر لال نہرو کے انتقال پر بھی آنجہانی نندہ 27مئی 1964 سے 9جون 1964تک نگراں وزیراعظم رہے تھے۔
