یواین آئی
نئی دہلی؍؍ جموں و کشمیر انتظامیہ نے سپریم کورٹ کو بدھ کے روز آگاہ کیا کہ جموں و کشمیر ہائی کورٹ بار اسوسی ایشن کے صدر میاں عبد القیوم کو جلد ہی رہا کر دیا جائے گا۔ اس درمیان عرضی گذار کو کل ہی رہا کرنے کی ان کے وکیل کی درخواست پر ریاستی انتظامیہ نے ہاں کر لیا۔ جموں و کشمیر انتظامیہ کی جانب سے پیش سالسٹر جنرل تُشار مہتا نے جسٹس سنسجے کشن کول کی صدارت والی بینچ کو بتایا کہ مرکز کے زیر انتظام ریاست کی انتظامیہ نے میاں عبد القیوم کو فوراً رہا کرنے کا فیصلہ کیا۔ مسٹر مہتا کی دلیلوں کی بنیاد پر عدالت نے ان کی رہائی کی اجازت دے دی۔ حالانکہ اس نے کہا میاں عبد القیوم سات اگست تک دہلی میں رہیں گے ، کشمیر نہیں جائیں گے اور کوئی بیان بھی جاری نہیں کریں گے ۔میاں عبد القیوم کی جانب سے پیش سینیئر ایڈووکیٹ دشینت دوے نے گذارش کی کہ اگر ہو سکے تو ان کے مؤکل کو کل ہی رہا کر دیا جائے تاکہ دہلی میں منتظر اہل خانہ ان کا خیر مقدم کر سکیں۔غور طلب ہے کہ عدالت نے گذشتہ پیر کو مسٹر مہتا کو ریاستی انتظامیہ سے یہ ہدایت لے کر آنے کو کہا تھا کہ کیا میاں عبد القیوم کو چھ اگست سے قبل رہا کیا جا سکتا ہے ۔مرکزی حکومت نے گذشتہ پیر کو سپریم کورٹ کو مطلع کیا تھا کہ جموں و کشمیر ہائی کورٹ بار اسوسی ایشن کے صدر کو چھ اگست کے بعد رہا کر دیا جائے گا۔ اس کے بعد عدالت نے مسٹر مہتا سے ہدایت لے کر آنے کو کہا تھا۔ گذشتہ برس پانچ اگست کو جموں و کشمیر سے متعلق آئین کی دفعہ 370 کی زیادہ تر توضیعات اور آرٹیکل 35 اے کو رد کیے جانے کے بعد سات اگست کو میاں عبد القیوم کو حراست میں لے لیا گیا تھا۔ اس وقت وہ تہاڑ جیل میں قید ہیں۔ آئندہ چھ اگست کو ان کی قید بے گناہی کو ایک برس ہو جائیں گے ۔
