حکومت سے قیمت عام کرنے کامطالبہ دہرایا
یواین آئی
نئی دہلی ؍؍کانگریس نے پانچ رافیل لڑاکا طیاروں کے ہندوستان پہنچنے پر خوشی کا اظہار کرتے ہو ئے اس کے لئے ہندوستانی فضائیہ کو مبارکباد پیش کی اور کہا کہ آٹھ سال قبل کانگریس حکومت نے جو پودہ لگایا تھاوہ اب پھل دینے لگا ہے ۔کانگریس نے ان طیاروں کے ہندوستان پہنچنے کے فورا بعد ہی اپنے آفیشل ٹویٹر ہینڈل پر کہا’’ ہندوستانی فضائیہ کو یہ طیارے حاصل کرنے کے لئے مبارکباد‘‘۔ کانگریس حکومت نے 2012 میں رافیل کی صلاحت پہچان کر اس کی خرید کے لئے جو کوشش کی ، اب وہ رنگ لائی ہے ۔ کانگریس اور بھارتیہ جنتا پارٹی کی خرید کے فرق سے بی جے پی کے گھپلے کی قلعی کھلتی ہے ’’۔اس کے ساتھ ہی کانگریس کے شعبہ مواصلات کے سربراہ رندیپ سنگھ سرجے والا نے بھی رافیل کا خیرمقدم کیا اور کہا ‘‘ رافیل کا ہندوستان میں خیر مقدم ! فضائیہ کے بہادر جوانوں کو مبارکباد’ ’۔اس کے ساتھ انہوں نے کہا ‘‘ آج ہر محب وطن یہ ضرور پوچھے کہ 526 کروڑ روپئے کا ایک رافیل اب 1670 کروڑ میں کیوں ؟ اب 126 کے بجائے 36 ہی کیوں ۔ میک ان انڈیا کی بجائے میک ان فرانس کیوں؟ کیوں پانچ سال کی تاخیر کیوں؟ ’’۔ دریں اثناء فرانس سے پانچ رافیل طیاروں کی پہلی کھیپ ملک میں پہنچنے کے درمیان کانگریس نے ایک بارپھر اس کی قیمت کو عام کرنے کا مطالبہ کیا ہے ۔کانگریس جنرل سکریٹری اور مدھیہ پردیش کے سابق وزیراعلی دگوجے سنگھ نے بدھ کو ٹویٹ کر کے کہا،’’ایک رافیل کی قیمت کانگریس حکومت نے 746کروڑ روپے طے کی تھی لیکن ‘چوکیدار’ صاحب کئی بار پارلیمنٹ میں اور پارلیمنٹ کے باہربھی مطالبہ کرنے کے باوجود آج تک ایک رافیل کتنے میں خریدہ ہے ،بتانے سے بچ رہے ہیں۔کیوں؟کیونکہ چوکیدار جی کی چوری پکڑی جائے گی!!‘چوکیدار’جی اب تو اس کی قیمت بتا دیں‘‘۔سال 2019 کے عام انتخابات میں رافیل کی قیمت کا مسئلہ کانگریس نے زور و شور سے اٹھایا تھا۔یہاں تک کہ یہ معاملہ سپریم کورٹ میں بھی پہنچا تھا۔کانگریس رکن پارلیمنٹ نے کہا،‘‘آخر رافیل فائٹر پلین آگیا۔126 رافیل خریدنے کے لئے کانگریس کی قیادت میں ترقی پسند اتحاد نے 2012 میں فیصلہ کیا تھا اور 18 رافیل کو چھوڑ کر باقی ہندوستانی حکومت کی ہندوستانی ایرونوٹکس لیمیٹیڈ میں بنانے کا التزام تھا۔یہ ہندوستان کے خودمختار ہونے کا ثبوت تھا۔ایک رافیل کی قیمت 746 کروڑ طے کی گئی تھی۔’’مسٹر سنگھ نے آگے لکھا،‘‘مودی حکومت آنے کے بعد فرانس کے ساتھ مودی جی نے بغیر وزارت دفاع اور خزانہ اور کابینہ کمیٹی کی منظوری کے نیا معاہدہ کرلیا اور ہندوستان ایرونوٹکس لیمیٹیڈ کا حق مار کر نجی کمپنی کو دینے کا معاہدہ کرلیا۔قومی سلامتی کی اندیکھی کرکے 126 رافیل خریدنے کے بجائے صرف 36 خریدنے کا فیصلہ کیا۔
