سرکاری ملازموں کی تنخواہیں عید الاضحی سے قبل ہی واگذار کی جائیں: ایجیک
یو این آئی
سرینگر؍؍ ایمپلائز جوائنٹ ایکشن کمیٹی کے صدر فیاض احمد شبنم نے حکومت سے عید الاضحی سے قبل ملازموں کی تنخواہیں واگذار کرنے کا مطالبہ کیا ہے۔انہوں نے کہا کہ عارضی ملازمین کی تنخواہیں ایک سال سے رکی پڑی ہیں جس کی وجہ سے ان کا عیال فاقہ کشی کے دہانے پر ہے۔موصوف صدر نے بدھ کے روز یہاں ایوان صحافت میں ایک پریس کانفرنس کے دوران کہا: ‘عید الاضحی قریب ہے، یہاں جو مختلف محکموں میں کام کرنے والے عارضی ملازمین ہیں، ایک سال سے تنخواہوں سے محروم ہیں، ہمارا سرکار سے مطالبہ ہے کہ وہ ملازموں خواہ وہ مستقل ہیں یا عارضی، کی تنخواہیں عید سے قبل واگذار کریں’۔انہوں نے کہا کہ عارضی ملازمین جو مستقل ملازمین کے ساتھ شانہ بشانہ کام کرتے ہیں، کے حالات زیادہ خراب ہیں اور ان کا عیال فاقہ کشی کے دہانے پر پہنچ گیا ہے۔فیاض شبنم نے کہا کہ عارضی ملازمین بھی موجودہ حالات میں اپنی جانیں جوکھم میں ڈال کے اپنے فرائض منصبی انجام دینے میں کوئی کسر باقی نہیں چھوڑتے ہیں۔انہوں نے کہا کہ ہمارا یہ بھی مطالبہ ہے، جس کے لئے ہم نے ماہ رواں کی چودہ تاریخ کو سول سکریٹریٹ کے باہر احتجاج بھی کیا تھا، کہ ان عارضی ملازموں کی نوکریوں کو مستقل کیا جائے اور ان کے لئے بھی ایک مربوط پالیسی مرتب کی جائے۔
