بیجنگ / جنیوا / نئی دہلی، 15 مارچ (یواین آئی) چین کے صوبہ ہبوئی کے دارالحکومت ووہان سے شروع ہونے والا خوفناک کورونا وائرس کی زد میں دنیا کے135 ملک آ چکے ہیں اور اس سے متاثر 5833 افراد کی موت ہو چکی ہے جبکہ 155086 افراد اس وبا سے فی الحال متاثر ہیں۔
ہندوستان میں بھی یہ آہستہ آہستہ پھیلنے لگا ہے اور اب تک 90سے زائد افراد میں اس وبا کی تصدیق ہو چکی ہے۔ ان لوگوں میں کیرالہ کے وہ تین لوگ بھی شامل ہیں، جنہیں علاج کے بعد چھٹی دے دی گئی تھی۔ ہندوستان میں کورونا وائرس سے اب تک ایک بزرگ خاتون سمیت دو افراد کی موت ہو چکی ہے۔
کوروناوائرس کا قہر تھمنے کا نام نہیں لے رہا ہے لیکن اب بھی اس سے سب سے زیادہ متاثر چین کے لوگ ہی ہیں۔ اس وائرس کے حوالہ سے تیار کی گئی ایک رپورٹ کے مطابق چین میں ہونے والی اموات کے 80 فیصد کیس 60 سال سے زیادہ عمر کے لوگوں میں پائے گئے تھے۔
