کورونا سے نپٹنے کے لئے جنگی پیمانہ پر تیاری کرنی ہوگی:گٹیرس
یواین آئی
اقوام متحدہ؍؍اقوام متحدہ کے سکریٹری جنرل اینٹونیو گٹیرس نے جمعہ کو کورونا وائرس (کووڈ۔ 19) وبا سے نپٹنے کے لئے عالمی برادری سے جنگی پیمانہ پر تیاری کرنے کی اپیل کی ہے ۔مسٹر گٹیرس کا بیان عالمی صحت تنظیم (ڈبلیو ایچ او) کے کورونا کو وبا اعلان کرنے کے بعد آیا ہے ۔انہوں نے ایک ویڈیو پیغام جاری کرکے کہاکہ ہمیں اس وائرس سے نپٹنے کے لئے جنگی پیمانہ پر تیاری کرنی ہوگی۔انہوں نے کہاکہ اس کا مطلب ہے کہ دنیا کے تمام ممالک پر ذمہ داری ہے کہ وہ موثر روک تھام حکمت عملی نافذ کریں، ایمرجنسی کارروائی نظام کو فعال کریں، مریضوں کی دیکھ بھال کے لئے اسپتالوں کو تیزی سے تیار کریں اورزندگی بچانے والے طبی تجربات کے فروغ میں تیزی لائی جائے ۔انہوں نے کہاکہ یہ وائرس صحت عامہ کے بحران کے علاوہ دنیا کے اقتصادی نظام کو متاثر کررہا ہے ۔مسٹر گٹیرس نے وارننگ دی کہ اس غیریقینی کی صورتحال سے مالیاتی بازاروں میں زبردست گراوٹ کے علاوہ سرمایہ کاری اور صارفین کی مانگ میں کمی کے ساتھ ہی ایک عالمی مندی کا خطرہ سامنے آیا ہے ۔اقوام متحدہ سکریٹری جنرل نے کہا کہ اقوام متحدہ کے ماہرین اقتصادیات کا اندازہ ہے کہ کورونا وائرس بحران اس برس کم از کم ایک ٹرلین ڈالر کی عالمی معیشت کو متاثر کرسکتا ہے ۔انہوں نے کہا کہ یہ گھبرانے کے بجائے صبر کرنے کا وقت ہے ، خوف کی جگہ منطق اور سائنس پر اعتماد کرنے کا وقت ہے ۔ خواہ اسے وبا اعلان کیا گیا ہے ، لیکن ہم ہی اس کو کنٹرول کرسکتے ہیں۔مسٹر گٹیرس نے کہاکہ ہم اس انفیکشن کو پھیلنے سے روک سکتے ہیں اور لوگوں کی زندگی بچا سکتے ہیں لیکن اس کے لئے ہر سطح پر مثالی کارروائی کی ضرورت ہوگی۔
