عوامی دربار میں لوگوں کے مسائل سنے
لازوال ڈیسک
پلوامہ؍؍کیمیکلز اور کھادوں کے مرکزی وزیر مملکت مکیش لکشمن بھائی مانڈاویہ نے آج کہا کہ پردھان منتری بھارتیہ جن اَوشدھی یوجنا کی بدولت سماج کے غریب اور پسماندہ طبقوں سے تعلق رکھنے والے مریضوں کو کافی فائدہ ملا ہے۔ اُنہوں نے اِن باتوں کا اِظہار آج یہاں ضلع انتظامیہ کمپلیکس میں جن اَوشدھی دوَس منانے کے سلسلے منعقدہ ایک تقریب سے خطاب کے دوران کیا۔وزیر مملکت نے کہا کہ وزیر اعظم نریندر مودی آج کے دِن پلوامہ کے لوگوں سے جن اَوشدھی کے بارے میں بات کر رہے ہیں جو کہ یہاں کے لوگوں کے لئے ایک تاریخی لمحہ ہے۔اُنہوںنے لوگوں سے اپیل کی کہ اِس سکیم جس کے تحت کفایتی نرخوں پر ادویات فراہم کی جاتی ہیں،سے استفادہ کریں۔اُنہوں نے مزید کہا کہ ملک بھر کے لاکھوں لوگ جن اَوشدھی کیندروں سے استفادہ کرتے ہیں۔وزیر نے پلوامہ کے نوجوانوں سے اپیل کی کہ وہ آگے آکر جن اَوشدھی کیندر قائم کریں۔آئی جی کشمیر وِجے کمار ،ڈی آئی جی جنوبی کشمیر اَتل کمار، ڈپٹی کمشنر پلوامہ ڈاکٹر راگھو لانگر ،ناظم صحت کشمیر ڈاکٹر سمیر مٹو،سٹیٹ ڈرگ کنٹرولر لوتیکا کھجوریہ،ایس پی پلوامہ اشیش مشرا اور دیگر افسران بھی اس موقعہ پر موجود تھے۔اِس موقعہ پر وزیر موصوف نے بیٹی بچائو بیٹی پڑھائو سکیم کے مستحقین میں بے بی کِٹس اور بالغ لڑکیوں میں سینٹری کِٹ تقسیم کئے۔اُنہوں نے حال ہی میں این ایچ ایم اور بی این بی کے تحت تعینات کی گئی سٹاف نرسوں کی بھی عزت افزائی کی۔اس سے قبل مرکزی وزیر مملکت نے ضلع ہسپتال پلوامہ میں قائم جن اَوشدھی کیندر کا دورہ کر کے وہاں دستیاب سہولیات کا جائزہ لیا۔بعد میں کئی عوامی وفود اور اَفراد نے وزیر کے ساتھ ملاقات کر کے اپنے مسائل اور مطالبات اُن کی نوٹس میں لائے۔ضلع پلوامہ کے زعفران اُگانے والوں کی ایسو سی ایشن کے ایک وَفد نے بور ویلز کو کار گر بنانے کے لئے علاحدہ ڈویژن کے قیام اور قومی زعفران مشن کو مزید دو برسوں تک بڑھانے کی مانگ کی۔ادویات بنانے والے یونٹ ہولڈروں کے ایک وفد نے مانگ کی کہ مقامی طور تیار کی جانے والی ادویات کو خرید نے کے لئے جے کے ایم ایس سی ایل کو ہدایت دی جانی چاہیئے ۔ انہوں نے مانگ کی کہ کل خریدی جانے والی ادویات میں مقامی ادویات کا 25فیصد حصہ ہونا چاہیئے۔خواتین کے سیلف ہیلپ گروپ اور ہینڈ لوم محکمہ سے وابستہ دستکاروں کے ایک گروپ نے بھی اپنے مطالبات وزیر موصوف کے سامنے رکھے۔کھاد ڈیلروں کے ایک وفد نے وادیٔ کشمیر میں نیشل ریک پوائنٹ کی بحالی ، کیمیائی کھادوں پر لگنے والے جی ایس ٹی کو ختم کرنے کی مانگ کی۔پلوامہ کی سول سوسائٹی کے ممبران نے ضلع ہسپتال میں ایم آر آئی سہولیات دستیاب رکھنے او ردیگر طبی سہولیات کی فراہمی میں مزید استحکام لانے کا مطالبہ کیا۔سول سوسائٹی کے ممبران نے عوامی اہمیت کے دیگر کئی مطالبات بھی مرکزی وزیر مملکت کی نوٹس میں لائے۔ضلع کے نوجوانوں پر مشتمل ایک وفد نے پلوامہ میں یوتھ ہوسٹل کی تعمیر اور یوپی ایس ای امتحانات کے لئے عمر کی حد میں رعایت کے علاوہ ضلع میں کھیل سرگرمیوں او رڈھانچے کو مزید مضبوط بنانے کی مانگ کی ۔دیگر کئی وفود نے بھی اپنے مطالبات وزیر کے سامنے رکھے۔وزیر نے تمام وفود اور اَفراد کے مطالبات غور سے سننے کے بعد اُن پر مناسب غور کا یقین دِلایا۔
