مودی سے کیجری وال نے ملاقات کی

دہلی تشدد پر بات چیت کی، کانگریس کی تنقید
یواین آئی

نئی دہلی؍؍دہلی کے وزیراعلی اروند کیجری وال نے وزیراعظم نریندر مودی سے ملاقات کرکے دہلی میں ہوئے تشدد کے ساتھ ہی قومی راجدھانی کی ترقی اورکرونا وائرس کے خطروں سے نمٹنے کے سلسلے میں بات چیت کی۔مسٹر کیجری وال نے پارلیمنٹ ہاؤس کے احاطے میں مسٹر مودی سے ملاقات کرنے کے بعد منگل کو نامہ نگاروں سے کہا کہ گزشتہ دنوں دہلی میں ہوئے پر تشدد واقعات پر ان کی مسٹر مودی سے سنجیدہ بات چیت ہوئی ہے ۔انہوں نے وزیراعظم سے اپیل کی ہے کہ مستقبل میں راجدھانی میں اس طرح کے واقعات نہ ہوں۔ مسٹر مودی نے ان کے اس درخواست پر اپنی رضامندی کا اظہار کیا ہے ۔ مسٹر کیجری وال نے وزیراعظم سے تشدد کے قصورواروں کے خلاف سخت کارروائی کرنے کابھی مطالبہ کیا ہے ۔انہوںنے کہا کہ اتوار کی شام کو دہلی میں ہوئے تشدد کے سلسلے جس قسم کی افواہیں پھیلائی گئی ہیں وہ تکلیف دہ ہیں لیکن اس پر دہلی پولس کی جانب سے جس طرح ردعمل سامنے آیا وہ قابل تعریف ہے ۔وزیراعظم نے کہا ہے کہ کرونا وائرس کے خطروں سے نمٹنے کے لئے بھی وزیراعظم سے بات چیت ہوئی کیونکہ دہلی میں اس کے ایک معاملے سامنے آئے ہیں۔انہوں نے دہلی میں پانچ سالہ ترقی کے لئے مسٹر مودی سے تعاون کا مطالبہ کیا جس پر وزیراعظم نے مکمل تعاون کی یقین دہانی کرائی۔کانگریس نے وزیر اعظم نریندر مودی اور دہلی کے وزیر اعلیٰ اروند کیجریوال کے درمیان منگل کے روز ہونے والی ملاقات کو ہدف تنقید بناتے ہوئے کہا کہ دونوں رہنماؤں کے درمیان ہونے والی میٹنگ کے بعد مسٹر کیجریوال کے بیان سے واضح ہوتا ہے کہ انہوں نے بھارتیہ جنتا پارٹی(بی جے پی) کے سامنے گھٹنے ٹیک دیئے ہیں اور یہ راز جلد از جلدفاش ہونا چاہئے ۔کانگریس کے ترجمان ابھیشیک منو سنگھوی نے آج یہاں پارلیمنٹ ہاؤس کے احاطے میں پریس کانفرنس میں کہا کہ مسٹر مودی سے ملاقات کے بعد مسٹر کیجریوال مسرورتھے ،یہ افسوسناک اور تعجب خیز صورتحال تھی۔ یہ ایک طرح کا راز تھا جس سے واضح ہوتا ہے کہ مسٹر کیجریوال نے گھٹنے ٹیک دیئے ہیں اور ان کی بدلی ہوئی صورتحال کی حقیقت سب کے سامنے آنی چاہئے ۔انہوں نے کہا کہ یہ تعجب کی بات ہے کہ مسٹر مودی سے ملاقات کے دوران وزیر اعلیٰ نے دہلی فسادات کے دوران 50 افراد کے اموات کے سلسلے میں کوئی بات نہیں کی ۔ انہوں نے مسٹر مودی سے یہ بھی نہیں پوچھا کہ جو لوگ نفرت پھیلا رہے تھے ان کے خلاف کیا کارروائی کی جا رہی ہے ۔ انہوں نے کہا کہ دونوں رہنماؤں کے درمیان دوستی کا یہ نیا رنگ حیران کن ہے ۔کانگریس کے ترجمان نے کہا کہ مسٹر کیجریوال جب مسٹر مودی سے ملاقات کرکے تو اس طرح کا پیغام دے رہے تھے جیسے بی جے پی کا وزیر اعلیٰ اپنے اعلیٰ کمان کو کلین چٹ دے رہا ہو۔ انہوں نے کہا کہ عام آدمی پارٹی(اے اے پی) مکمل طور پر بی جے پی کی بی ٹیم کے طور پر کام کر رہی ہے ۔غور طلب ہے کہ مسٹر کیجریوال نے آج پارلیمنٹ ہاؤس میں مسٹر مودی سے ملاقات کی اور دہلی کی صورتحال پر تبادلہ خیال کیا۔ مسٹر کیجریوال نے اس ملاقات کو رسمی ملاقات قرار دیا ۔اس سے پہلے مسٹر سنگھوی نے کہا کہ دہلی فسادات کے سلسلے میں پارلیمنٹ میں بحث کروانے کے معاملے میں حکومت کا رخ عجیب وغریب ہے ۔ حکومت کہتی ہے کہ وہ اس معاملے پر ہولی کے بعد یا حالات معمول پرہوجانے کے بعد بحث کروائے گی، انہوں نے سوال کیا کہ حکومت کو بتانا چاہئے کہ کیا صورتحال ابھی حسب معمول نہیں ہوئی ہے ۔