یہ لڑائی ترنگا بمقابلہ بھگوا ہے، قاری صہیب
بسفی بلاک میں پریورتن ریلی سے تیجسوی یادو سمیت دیگر لیڈران کا خطاب، ہزاروں عوام کی شرکت، شاہین باغ مظاہرین کی ہمت کو سلام، کاغذ نہیں دکھانے کا فیصلہ، نتیش کمار کو سبق سکھانے کا عزم
شرف الدین تیمی
مدھوبنی؍؍ضلع کے بسفی میں پریورتن ریلی سے خطاب کرتے ہوئے بہار کے سابق نائب وزیر اعلی تیجسوی یادو نے کہا کہ مسلمان تو بہانہ ہیں اصل نشانہ دلت سماج اور پچھڑے لوگ ہیں ، بی جے پی سے لڑائی لڑنے کا انجام جیل ہے نتیش کمار نے بہار کے عوام کو دھوکہ دیا لالو کے دور حکومت میں ایک بھی دنگا نہیں ہوتا تھا لیکن اب یہاں ہاف پینٹ پہن کر پریڈ ہورہا ہے۔ انہوں نے عوام سے اپیل کی کہ جس طرح آپ نے جھارکھنڈ میں سوجھ بوجھ سے کام لیا بی جے پی ہار گئی جس طرح آپ نے دہلی میں کام کیا تو بی جے پی ہار گئی اب بہار میں الیکشن ہے اس لیے یہاں بھی سوجھ بوجھ سے کام لیں اور بہار کی ترقی کیلیے دلتوں اور مسلمانوں کے حقوق کی بازیابی کے لیے راشٹریہ جنتا دل کا انتخاب کریں کیونکہ یہی پارٹی بی جے پی کے فرقہ پرستی کو مات دے سکتی ہے۔ انہوں نے کہا کہ اگر آپ کا تعاون شامل رہا تو ہم جیتے جی بی جے پی ار ایس ایس کے منصوبے کو کامیاب نہیں ہونے دیں گے۔ انہوں نے بہار کے کانٹریکٹ ٹیچروں کی طرف سے مساوی کام مساوی تنخواہ کو لیکر جاری ہڑتال پر بھی تعاون دینے کا اعلان کیا اس موقع پر انہوں نے نتیش کمار پر جمکر نشانہ سادھا اور ہندومسلم ایکتا کے لیے آواز دو ہم ایک ہیں کے نعرے لگائے۔مسٹر تیجسوی یادو نے سی اے اے، این پی آر اور این آرسی پر نتیش کمار کے روے کی مذمت کی اور بہار کے عوام سے کاغذ نہ دکھلانے کی بھی اپیل کی سی اے اے کے خلاف عوامی تحریک کا چہرہ بنے شاہین باغ کی جیالی خواتین سمیت ملک بھر میں احتجاج کررہی خواتین کی ہمتوں کو سلام پیش کرتے ہوئے ان کی حوصلہ افزائی کی اور لڑائی میں ہر ممکن تعاون کا یقین دلایا قبل ازیں خطاب کرتے ہوئے یوتھ آرجے ڈی کے ریاستی صدر قاری صہیب نے کہا کہ کچھ لوگ سی اے اے کو ہندو مسلم بناکر پیش کررہے ہیں میں یہ واضح کردینا چاہتا ہوں کہ یہ لڑائی ہندو مسلم کی لڑائی نہیں بلکہ ملک بچانے کی لڑائی ہے یہ لڑائی ترنگا بمقابلہ بھگوا لڑائی ہے انہوں نے بہار کے عوام کو ہونے والے اسمبلی الیکشن میں سوچ سمجھ کر ووٹ کرنے کی اپیل کی۔
