یواین آئی
سرینگر؍؍ وادی کشمیر میں کئی دنوں کے خوشگوار موسم کے بعد منگل کے روز سہ پہر تک مطلع بھر ابر آلود رہنے کے بعد بارش کا سلسلہ شروع ہوا۔ محکمہ موسمیات نے وادی میں 13 اور 14 فروری کو بڑے پیمانے پر برف وباراں کی پیش گوئی کی ہے تاہم بعد ازں 17 فروری تک موسم مجموعی طور پرخشک رہنے کی توقع ہے۔وادی کا بیرون دنیا کے ساتھ زمینی و ہوائی رابطہ برابر برقرار وبحال ہے۔ ہائی وے ذرائع کے مطابق وادی کو ملک کے دوسرے حصوں کے ساتھ جوڑنے والی سری نگر – جموں قومی شاہراہ منگل کے روز بھی یک طرفہ ٹریفک کی نقل وحمل کے لئے کھلی رہی اور گاڑیوں کو جموں سے سری نگر روانہ ہونے کی اجازت تھی۔وادی کشمیر میں 20 روزہ چلہ خورد کے دوسرے عشرے کے دوران کئی دنوں کے خوشگوار موسم کے بعد منگل کے روز موسم خشک مگر مطلع ابر آلود رہا۔ آفتاب دن بھر بادلوں کی اوٹ میں گھرا رہا جس کے باعث لوگ اس کے دیدار سے محروم رہے بلکہ بعد سہ پہر بوندا باندی بھی وقفہ وقفہ سے شروع ہوئی۔لوگوں کا کہنا ہے کہ سردیوں کے بادشاہ چلہ کلان کے دور اقتدار کے برعکس چلہ خورد کے دور حکومت میں لوگوں کو کافی راحت نصیب ہوئی فی الوقت بھاری برف باری ہوئی نہ ہی سردی کی شدت میں زیادہ اضافہ ہوا۔محکمہ موسمیات کے ترجمان نے بتایا کہ وادی میں اگرچہ موسم خشک ہے لیکن شبانہ درجہ حرارت مسلسل نقطہ انجماد سے نیچے درج ہورہا ہے۔ انہوں نے بتایا کہ سری نگر میں کم سے کم درجہ حرارت منفی 0.2 ڈگری سینٹی گریڈ ریکارڈ کیا گیا جبکہ وادی کے مشہور آفاق سیاحتی مقامات پہلگام اور گلمرگ میں کم سے کم درجہ حرارت بالترتیب منفی 5.6 ڈگری سینٹی گریڈ اور منفی 6.4 ڈگری سینٹی گریڈ ریکارڈ ہوا ہے۔وادی کے سرحدی ضلع کپواڑہ میں کم سے کم درجہ حرارت منفی 3.6 ڈگری سینٹی گریڈ جبکہ قاضی گنڈ اور کوکر ناگ میں کم سے کم درجہ حرارت بالترتیب منفی 3.8 ڈگری سینٹی گریڈ اور منفی 1.9 ڈگری سینٹی گریڈ ریکارڈ ہوا ہے۔لداخ یونین ٹریٹری کے ضلع لیہہ میں کم سے کم درجہ حرارت منفی 12.2 ڈگری سینٹی گریڈ جبکہ قصبہ دراس میں کم سے کم رجہ حرارت منفی 22.7 ڈگری سینٹی گریڈ ریکارڈ کیا گیا۔
