ہماری حکومت جو کہتی ہے وہ کرتی ہے: راجناتھ

مسٹر سنگھ نے مشرقی دہلی کے کونڈلی اسمبلی حلقہ میں منگل کوبی جے پی امیدوارراجکمار ڈھلوں کے حق میں انتخابی اجلاس سے خطاب کرتے ہوئے کہاکہ ہماری حکومت جو کہتی ہے وہ کرتی ہے۔ مسٹر سنگھ نے کہا کہ عام آدمی پارٹی کی حکومت نے پانچ برسوں میں اپنا کوئی بھی وعدہ پورا نہیں کیا۔ بی جے پی کی حکومت جو کہتی ہے اسے پورا کرتی ہے۔
مسٹر سنگھ نے کہاکہ میں کونڈلی اسمبلی حلقہ کے امیدوار راجکمار ڈھلوں کے لئے یہاں آیا ہوں۔ راجکمار ڈھلوں ایک ایسے امیدوار ہیں جن کے پاس کوئی پراپرٹی نہیں ہے اور وہ خود جھگی میں رہتے ہیں۔
انہوں نے کہاکہ عام آدمی پارٹی کے امیدوار کروڑ پتی ہیں اور اگر ہمارے امیدوار کو الیکشن لڑنا ہوتا ہے وہ عوام سے چندہ لیکر الیکشن لڑتے ہیں۔ میں سمجھتا ہوں کہ کونڈلی اسمبلی حلقہ سے راجکمار ڈھلوں کی جیت یقینی ہے۔
انہوں نے کہاکہ 2022 تک ملک میں تمام کو پکا مکان دینے کا کام مکمل کرلیا جائے گا۔ ساتھ ہی تمام گھروں میں نل سے صاف پینے کا پانی بھی دستیاب کرا دیا جائے گا۔ کسی کو یقین نہیں تھا کہ مودی حکومت گھر گھر میں بیت الخلا بنائے گی۔ ملک میں دیہی علاقوں میں بیت الخلا کی تعمیر کراکر ہماری حکومت نے خواتین کا احترام کیا ہے