یواین آئی
سرینگر؍؍وادی کشمیر میں محکمہ موسمیات کی پیش گوئی کے عین مطابق منگل کی علی الصبح سے برف باری کے ایک اور مرحلے کا آغاز ہوا اور بالائی علاقوں میں ہلکی سے درمیانی درجے کی جبکہ میدانی علاقوں میں ہلکے درجے کی برف باری ہوئی تاہم مطلع ابر آلود رہنے کے باعث شبانہ درجہ حرارت میں ایک بار پھر قدرے بہتری واقع ہونے سے سردی کی شدت میں قدرے کمی واقع ہوئی ہے۔موصولہ اطلاعات کے مطابق وادی کے مشہور سیاحتی مقام پہلگام میں منگل کی علی الصبح سے برف باری شروع ہوئی جو دوپہر تک جاری تھی اس دوران قریب پانچ انچ تازہ برف جمع ہوئی۔ پہلگام میں قریب چار فٹ برف پرانی ہی موجود ہے۔ وادی کے ایک اور مشہور سیاحتی مقام گلمرگ میں بھی صبح سے ہی برف باری شروع ہوئی جو دن بھر وقفہ وقفہ سے جاری رہی اور دوپہر تک قریب دو انچ برف جمع ہوئی تھی۔ گلمرگ کے بالائی علاقوں میں ابھی قریب سات فٹ برف پرانی ہی جمع ہے جبکہ میدانی علاقوں میں بھی قرب پانچ فٹ برف جمع ہے۔یاد رہے کہ محکمہ موسمیات نے وادی میں 21 جنوری کو درمیانی درجے کی برف باری اور بعد ازاں 22 جنوری سے 26 جنوری تک موسم مجموعی طور پر خشک رہنے کی پیش گوئی کی ہے۔ادھر خراب موسمی حالات کے باوصف وادی کا بیرون دنیا کے ساتھ زمینی وفضائی رابطہ بحال و برقرار ہے۔ ہائی وے ذرائع کے مطابق سری نگر – جموں قومی شاہراہ پر منگل کے روز بھی ٹریفک کی نقل وحمل جاری وساری رہی۔ انہوں نے بتایا کہ شاہراہ پر منگل کے روز بھی گاڑیوں کو جموں سے سری نگر آنے کی اجازت دی گئی جس دوران مخالف سمت سے کسی بھی گاڑی کو چلنے کی اجازت نہیں دی گئی۔ وادی میں سردیوں کے بادشاہ چلہ کلان کے 32 ویں دن بروز منگل صبح سے ہی میدانی و بالائی علاقوں میں برف وباراں کا ایک اور مرحلہ شروع ہوا، میدانی علاقوں میں ہلکے درجے کی جبکہ بالائی علاقوں میں کہیں کہیں درمیانی سے بھاری درجے کی برف باری ہوئی۔عینی شاہدین کے مطابق اگرچہ بالائی علاقوں میں کہیں کہیں دن بھر وقفہ وقفہ سے ہلکی برف باری جاری رہی تاہم میدانی علاقوں بالخصوص سری نگر میں دوپہر کے بعد موسم مجموعی طور پر خشک رہا۔وادی میں حالیہ بھاری برف باری کے باعث جہاں ایک طرف شہر سری نگر کی تمام چھوٹی بڑی سڑکیں ہنوز زیر آب ہیں اور محکمہ اطلاعات و تعلقات عامہ کے احاطے میں ابھی بھی پانی اس قدر جمع ہے کہ محکمہ کے عملے اور صحافیوں و دیگر لوگوں کا دفتر میں داخل ہونا پْر خطر بھی ہے اور امر محال بھی ہے وہیں دیہات کی سڑکوں پر تازہ برف باری سے صبح کے وقت پھسلن پیدا ہوئی تھی جس کے پیش نظر کہیں ٹرانسپورٹ کی نقل وحمل کافی دیر تک متاثر رہی تو کہیں گاڑیاں کچھوے کی رفتار سے چل رہی تھیں۔ محکمہ موسمیات کے ایک ترجمان کے مطابق وادی میں مطلع ابر آلود رہنے سے شبانہ درجہ حرارت میں ایک بار پھر قدرے بہتری واقع ہوئی ہے۔انہوں نے کہا کہ سری نگر میں کم سے کم درجہ حرارت منفی 1.2 ڈگری سینٹی گریڈ ریکارڈ ہوا ہے جو گزشتہ شب کے درجہ حرارت سے منفی 2.2 ڈگری سینٹی گریڈ کم ہے۔وادی کے مشہور سیاحتی مقامات گلمرگ اور پہلگام میں کم سے کم درجہ حرارت بالترتیب منفی 8.0 ڈگری سینٹی گریڈ اور منفی 3.9 ڈگری سینٹی گریڈ ریکارڈ کیا گیا۔یونین ٹریٹری آف لداخ کے ضلع لیہہ میں کم سے کم درجہ حرارت منفی 16.8 ڈگری سینٹی گریڈ جبکہ دراس میں کم سے کم درجہ حرارت منفی 17.6 ڈگری سینٹی گریڈ ریکارڈ کیا گیا۔وادی کے سرحدی ضلع کپواڑہ میں کم سے کم درجہ حرارت منفی 1.9 ڈگری سینٹی گریڈ جبکہ قاضی گنڈ اور کوکر ناگ میں کم سے کم درجہ حرارت بالترتیب منفی 2.0 ڈگری سینٹی گریڈ اور منفی 3.1 ڈگری سینٹی گریڈ ریکارڈ کیا گیا۔
