منگل کو درمیانی سے بھاری درجے کی برف باری ہوسکتی ہے: محکمہ موسمیات
یواین آئی
سرینگر؍؍وادی کشمیر میں شہنشاہ زمستان چلہ کلان کے اپنے 40 روزہ دور اقتدار کے آخری مرحلے میں داخل ہونے کے بیچ اگرچہ پیر کے روز بھی موسم خشک اور دن میں ہلکی دھوپ بھی کھلی رہی تاہم شبانہ درجہ حرارت میں مزید تنزلی درج ہونے کے باعث صبح اور شام کے وقت شہر و گام کی سڑکوں پر پھسلن پیدا ہونے سے گاڑیوں کی نقل وحمل متاثر رہی۔ادھر محکمہ موسمیات کے ایک ترجمان نے وادی، پیر پنچال اور چناب کے علاقوں میں پیر کی شام سے برف وباراں کے ایک اور مرحلے کی پیش گوئی کرتے ہوئے کہا کہ وادی میں 21 جنوری یعنی منگل کے روز درمیانی سے بھاری درجے کی برف باری جبکہ 22 جنوری سے 26 جنوری تک موسم مجموعی طور پر خشک رہنے کی پیش گوئی کی ہے۔وادی کا بیرونی دنیا کے ساتھ زمینی و فضائی رابطہ پیر کے روز بھی بغیر کی کسی خلل کے جاری وساری رہا اور ٹرین سروس بھی بدستور بحال ہے۔ہائی وے ذرائع نے بتایا کہ سری نگر – جموں قومی شاہراہ پر ٹریفک کی یک طرفہ نقل وحمل جاری و ساری ہے اور پیر کے روز گاڑیوں کو جموں سے سری نگر آنے کی اجازت دی گئی۔ انہوں نے کہا کہ اس دوران مخالف سمت سے کسی بھی گاڑی کو چلنے کی اجازت نہیں دی گئی۔وادی کشمیر میں شہنشاہ زمستان چلہ کلان کے اپنے 40 روزہ دور اقتدار کے آخری مرحلے میں داخل ہونے کے بیچ پیر کے روز بھی موسم خشک رہا اور دن میں بسا اوقات دھوپ بھی کھلی رہی تاہم شبانہ درجہ حرارت میں مزید تنزلی درج ہونے کے باعث جہاں آبی ذخائر صبح کے وقت منجمد ہوئے تھے وہیں شہر وگام کی سڑکوں پر کہر لگنے سے پھسلن پیدا ہوئی تھی جس کے باعث ٹرانسپورٹ کی نقل وحمل کافی دیر تک متاثر رہی۔شاہدین کے مطابق صبح کے وقت گاڑیاں سڑکوں پر پھسل رہی تھیں جس کے باعث کہیں علاقوں میں گاڑیوں کی نقل وحمل کافی دیر تک متاثر رہی تو کہیں علاقوں میں گاڑیاں کچھوے کی رفتار سے چل رہی تھیں۔دریں اثنا محکمہ ٹریفک نے ڈرائیور حضرات کو صبح اور شام کے وقت گاڑیاں احتیاط سے چلانے کی ہدایات جاری کی ہیں نیز معالجین نے لوگوں کو بھی سڑکوں پر پھسلن ہونے کے پیش نظر چلنے پھرنے میں احتیاط برتنے کی صلاح دی ہے۔موصولہ اطلاعات کے مطابق دیہی علاقوں میں کئی افراد سڑکوں پر چلنے کے دوران گر جانے کے باعث زخمی ہوئے ہیں۔محکمہ موسمیات کے ایک ترجمان کے مطابق وادی میں شبانہ درجہ حرارت میں مزید تنزلی درج کی گئی۔ انہوں نے کہا کہ سری نگر میں کم سے کم درجہ حرارت منفی 3.4 ڈگری سینٹی گریڈ ریکارڈ کیا گیا جبکہ وادی کے مشہور زمانہ سیاحتی مقامات گلمرگ اور پہلگام میں کم سے کم درجہ حرارت بالترتیب منفی 12.8 ڈگری سینٹی گریڈ اور منفی 9.0 ڈگری سینٹی گریڈ ریکارڈ کیا گیا۔یونین ٹریٹری آف لداخ کے ضلع لیہہ میں کم سے کم درجہ حرارت منفی 17.6 ڈگری سینٹی گریڈ جبکہ دراس میں کم سے کم درجہ حرارت منفی 26.9 ڈگری سینٹی گریڈ ریکارڈ ہوا ہے۔وادی کے سرحدی ضلع کپواڑہ میں کم سے کم درجہ حرارت منفی 5.8 ڈگری سینٹی گریڈ جبکہ قاضی گنڈ اور کوکر ناگ میں کم سے کم درجہ حرارت بالترتیب منفی 5.0 ڈگری سینٹی گریڈ اور منفی 5.4 ڈگری سینٹی گریڈ ریکارڈ کیا گیا
