یو این آئی
حیدرآباد؍؍خواتین کو بااختیار بنانے اور ان کو امکانی حملوں سے بچانے میں مدد کرنے کے لئے تلنگانہ کی سائبرآباد پولیس نے خواتین کی سلامتی اور سیکوریٹی کو ترجیح دینے کے بہ حیثیت مجموعی منصوبہ کے حصہ کے طورپر خواتین ولڑکیوں کو خود کے دفاع کی مہارت سکھانے پر توجہ مرکوز کی ہے ۔سائبرآباد شی ٹیمس کی جانب سے یہ تربیت شروع کی گئی ہے جس کے لئے سوسائٹی فارسائبرآباد سیکوریٹی کونسل نے تعاون کیا ہے ۔ویمن اینڈ چائلڈ سیفٹی ونگ نے خود کے دفاع کے ماہرین کی خدمات اس خصوص میں حاصل کی ہے اور تعلیمی و آئی ٹی اداروں میں بیداری سیشنس منعقد کئے جارہے ہیں۔ویمن اینڈ چائلڈ سیفٹی ونگ کی ڈی سی پی انوسیا نے کہا کہ کچھ توجہ اور بنیادی خود کے دفاع کی تکنیک،خواتین کے لئے ہتھیار ثابت ہوسکتی ہے ۔خود کے دفاع کی تکنیک سکھانے والے طلبہ اور ملازمین آسانی تکنیک کا استعمال کررہے ہیں تاکہ مستقبل میں پیداہونے والی کسی بھی صورتحال سے نمٹا جاسکے ۔خود کے دفاع کی تکنیک کے بیداری پروگرام مکمل تربیتی سیشن والے ہوتے ہیں جن کے ذریعہ بنیادی دفاعی تکنیک کی تفصیلات بتائی جاتی ہے ۔بیشتر لڑکیاں اور خواتین ہراسانی،جنسی استحصال کا شکار ہوتی ہیں۔ان کے لئے بیداری ضروری ہوتی ہے تاکہ اس طرح کی صورتحال سے نمٹا جاسکے ۔پولیس پہلے ہی تعلیمی اداروں اور آئی ٹی فرمس سے رجوع ہورہی ہے تاکہ بیداری پیداکی جاسکے ۔انہوں نے کہا[؟]ہم خود کے دفاع کے تربیتی سیشنس کو بہتر بنانے کا منصوبہ رکھتے ہیں تاکہ سماج کے تمام طبقات سے تعلق رکھنے والی بڑی تعداد میں لڑکیوں اور خواتین کو فائدہ ہوسکے ۔ہمارے پاس مزید تکنیکس ہیں،ان کو جامع بنایا جائے گا۔انہوں نے اس احساس کا اظہار کیا کہ خواتین اور لڑکیوں کی سلامتی کے مسئلہ سے نمٹنے کیلئے واحد حکمت عملی کافی نہیں ہے ۔خواتین کے لئے ضروری ہے کہ وہ صورتحال سے بہتر طورپر نمٹے ۔انہوں نے کہاکہ اگر آپ بس میں ہوں،ڈرائیور اور کنڈکٹرسے شکایات رجوع کی جاسکتی ہیں۔بعض مرتبہ صرف ایک سیفٹی پن ہی خود کے دفاع کا ہتھیار بن سکتی ہے
