بی جے پی کو نازیوں کے انجام سے سبق لینا چاہئے۔ صدر تعمیر ملت سید جلیل احمد ایڈوکیٹ
حیدرآباد؍؍صدر کل ہند مجلس تعمیر ملت سید جلیل احمد ایڈوکیٹ نے کل شب جواہر لال نہرو یونیورسٹی دہلی میں نقاب پوش غنڈوں کی دہشت اور بربریت پر شدید غم و غصہ کا اظہار کرتے ہوئے کہا کہ گزشتہ سال کے ختم سے ملک میں جو واقعات ہورہے ہیں اور بے گناہ شہریوں پر جو زیادتیاں ہورہی ہیں ان سے انسانیت کا سر شرم سے جھک گیا ہے اور بین الاقوامی برادری میںہندوستان کی رسوائی ہو رہی ہے ‘ لیکن حکمرانوں کو اس کی کوئی فکر نہیں ہے۔ انہو ںنے کہا کہ این ڈی اے کے برسراقتدار آنے کے بعد طلاق ثلاثہ ‘ دفعہ 370 کی منسوخی اور بابری مسجد پر سپریم کورٹ کے فیصلے جیسے کئی اقدامات ہوئے ‘ لیکن مسلمانوں نے صبر و شکر سے کام لیا اور کبھی صدائے احتجاج بلند نیں کی۔ لیکن جو شہریت ترمیی قانون منظور کیا گیا اس سے ہنوتوا کا فاشصت چہرہ بے نقاب ہوگیا اور اس سیاہ قانون کے خلاف جو صدائے احتجاج بلند کی جارہی ہے اس کو پولیس اور آر ایس ایس کی بے رحمانہ کارروائیوں کے ذریعہ کچلا جارہا ہے۔ جس کی جتنی مذمت کی جائے کم ہے۔ انہو ں نے کہا کہ ہندوستان کے جس دستور کے تحت موجودہ حکومت نے الیکشن لڑا اور اقتدار سنبھالا اسی دستورکی رو سے ہندوستان ایک سکیولر اور جمہوری ملک ہے جہاں تمام شہری قانون کے سامنے برابر ہیں اور ان میں کوئی بھید بھاؤ نہیںکیا جاسکتا۔ لیکن سی اے اے میں واضح طور پر مسلمانوں کے خلاف امتیاز برتا گیا ہے اور اس کو بنیاد بنا کر این پی آر اور این آر سی میں مسلمانوں کی شہریت ختم کرنے کی سازش تیار کی گئی ہے۔ حکومت کے اس منصوبہ کے خلاف ملک کے تمام عوام بلا لحاظ مذہب و ملت ایک جٹ ہوکر اٹھ کھڑے ہوئے ہیں اور دستور کی حفاظت کے لئے جدوجہد کررہے ہیں ‘ لیکن یہ انتہائی افسوس کی بات ہے کہ آر ایس ایس سے وابستہ عناصر پولیس کی مددسے اس پرامن جدوجہد کو کچل رہے ہیں ۔ پہلے جامعہ ملیہ پھر علی گڑھ مسلم یونیورسٹی اور اس کے بعد جواہر لال نہرو یونیورسٹی میں طلبا و طالبات اور اساتذہ کو بے رحمی کے ساتھ لاٹھیوں اور دھاتی راڈز سے مارا پیٹا گیا۔ انہوںنے کہا کہجمہوری آمریت سب سے بد ترین طرز حکمرانی ہے جو ملک کو نراج کی طرف لے جارہی ہے۔ تین ہفتوں سے جاری ایجی ٹیشن ‘ اور پولیس کی بربریت اور آر ایس ایس ورکرز کی غنڈہ گردی سے ملک کو ایسی سمت لے جایا جارہا ہے جہاں سے پلٹنا مشکل ہوگا۔ مرکزی وزیر داخلہ شری امیت شاہ نے کہا ہے کہ حکومت ایک انچ بھی پیچھے نہیں ہٹے گی‘ لیکن وہ احتجاجیوںکو کچلتے ہوئے ان کو احتجاج ختم کرنے پر مجبور کررہی ہے۔لیکن اب جواہر لال نہرو یونورسٹی میں غنڈہ گردی سے اب سارے ملک میں احتجاج میں اور بھی شدت پیدا ہوگئی ہے۔ انہوں نے مزید کہا کہ جرمنی میں ہٹلر کی نازی پارٹی نے اسی طرح کی پالیسی انائی تھی اور اس کا رویہ یہودی اقلیت اور ان کا ساتھ دینے والے جرمنی شہریوں کے ساتھ ایسا ہی تھا‘ ان کا ظلم و ستم بھی بہت بڑھ گیا تھا ۔ اور افسوس کی بات ہے کہ بی جے پی نے بھی یہی رویہ اختیار کیا ہے ‘ ان کو تاریخ سے سبق لینا چاہئے اور یہ دیکھنا چاہئے کہ ہٹلر کو آخر میں خود کشی کرلینی پڑی تھی اور اس نے اپنی حماقت سے جرمنی کو تباہ کردیا اور اس کا بٹوارہ بھی کردیا گیا۔
