یو این آئی
پٹنہ؍؍ بہار کے وزیراعلی نتیش کمار نے آج سابق وزیر آنجہانی ارون جیٹلی کے یوم پیدائش کے موقع پر ان کی قد آور مجسمے کی نقاب کشائی کی اور کہا کہ مسٹر جیٹلی کی بہار سے خصوصی انسیت تھی اور ان کے دل میں یہاں کے لوگوں کے تئیں احترام کا جذبہ تھا ۔مسٹر کمار نے یہاں مسٹر جیٹلی کی اہلیہ سنگیتا جیٹلی اور کنبے کے دیگر ارکان کی موجودگی میں کنکڑ باغ پارک نمبر 31 میں سابق مرکزی وزیر مسٹر جیٹلی کی قد آور مجمسے کی نقاب کشائی کی ۔ انہوں نے کہا کہ ‘‘وہ بہار کے رہنے والے نہیں تھے لیکن ان کا بہار سے خصوصی لگاؤ تھا۔ بہار کے لوگوں کے تئیں ان کے دل میں احترام کا جذبہ تھا۔ انہوں نے بہار کے لئے جو تعاون دیا ہے ، اسے ہم بھول نہیں سکتے ’’۔وزیراعلی نے کہا کہ مسٹر جیٹلی نے مرکزی وزیر کے طور پر بہار کے لئے کئی اہم کام کئے ہیں۔ بہار اور بہار کے عوام کے تئیں ان کا نظریہ ہمیشہ برابری کا تھا۔ انہوں نے کہا کہ بہار میں لوک آیکت کے نئے قانون بنانے میں بھی مسٹر جیٹلی نے اہم تعاون دیا تھا۔ وہ انہیں ہمیشہ یاد رکھیں گے ۔ انہوں نے کہا کہ جیٹلی کے مجسمے کی آج نقاب کشائی کی گئی ہے ۔ یہ ان کے تئیں بہار کے عوام کا احترام ہے ۔
