لازوال ڈیسک
جموں؍؍صحت و طبی تعلیم کے فائنانشل کمشنر اَتل ڈولو کی صدارت میں آج یہاں آیوش سوسائٹی آف جموں اینڈ کشمیر کی ایگزیکٹیو کمیٹی کی دسویں میٹنگ منعقد ہوئی ۔ اِس دوران متعلقہ اَفسران کو جموں کشمیر میں نیشنل آیور ویدا ، یوگا ، نیچرو پیتھی ، یونانی ، سدھا اور ہومیو پیتھی کے تحت جاری سکیموں کی مؤثر عمل آوری کی ہدایات دی گئیں ۔ میٹنگ میں ڈائریکٹر اِنڈین سسٹم آف میڈیسن موہن سنگھ ، ڈائریکٹر فائنانس صحت و طبی تعلیم محمد رفیق اور محکمہ کے جوائنٹ ڈائریکٹر مدن لال کے علاوہ دیگر کئی اَفسران موجود تھے ۔میٹنگ کے دوران فائنانشل کمشنر نے نیشنل آیوش مشن کے تحت کشتواڑ ، کپواڑہ ، بلاور اور کولگام میں قائم کئے جا رہے پچاس بستروں والے انٹی گریٹیڈ ہسپتالوں کے تعمیری کام میں سرعت لانے کی ہدایت دی ۔ ڈائریکٹر آئی ایس ایم نے میٹنگ میں جانکاری دی کہ اِن چار ہسپتالوں کی تعمیر کا کام مختلف مراحل میں ہے ۔ فائنانشل کمشنر نے ہیلتھ اینڈ ویلنیس مراکز کے قیام کے کام میں بھی تیزی لانے کی ہدایت دی ۔ پبلک فائنانشل منیجمنٹ سسٹم کی عمل آوری کیلئے ڈائریکٹر آئی ایس ایم کو اس کی مؤثر عمل آوری کیلئے اقدامات کرنے کی ہدایت دی گئی ۔ فائنانشل کمشنر نے مختلف سکیموں اور پروگراموں کی عمل آوری کیلئے آیوش سوسائٹی کو ایک ٹھوس نقشِ راہ تیار کرنے کی ہدایت دی
