یو این آئی
حیدرآباد //شہر حیدرآباد کے سائبر آباد پولیس کمشنریٹ کے حدود میں 26سالہ وٹرنری ڈاکٹر کی اجتماعی عصمت دری کے بعد اس کے قتل اور لاش کو جلادینے کی واردات میں ملوث ملزمین کی انکاونٹر میں ہلاکت کے بعد ان کی لاشوں کے گزشتہ روز کئے گئے دوبارہ پوسٹ مارٹم کی ویڈیو سی ڈی آ ج تلنگانہ ہائی کورٹ میں پیش کردی گئی۔ایمس کے فارنسک کے ماہرین کا بورڈ اس دوبارہ پوسٹ مارٹم کے لئے تشکیل دیاگیا تھا جس نے گزشتہ روز گاندھی اسپتال میں ان لاشوں کا دوبارہ پوسٹ مارٹم کیاتھا۔اس ویڈیو کے ساتھ اس دوبارہ پوسٹ مارٹم کی ابتدائی رپورٹ بھی ہائیکورٹ کے رجسٹرار کو مہر بند لفافے میں پیش کردی گئی۔آئندہ ہفتہ مکمل رپورٹ عدالت میں پیش کئے جانے کی توقع ہے ۔ہائیکورٹ نے دوبارہ پوسٹ مارٹم کی رپورٹ پیش کرنے کی ہدایت دی تھی۔ہائیکورٹ کے رہنمایانہ خطوط کے مطابق ہی یہ دوبارہ پوسٹ مارٹم انجام دیا گیااورلاشوں کے زخموں کا مکمل اور تفصیلی معائنہ بھی کیاگیا۔جس زخم کے بارے میں شبہ ہو، اس کا ایکسرے نکال لیا گیا۔یہ بھی دیکھا گیا کہ آیالاشوں پر نظر نہ آنے والے زخم کے نشان تو نہیں ہیں؟اس طرح تمام زاویوں سے یہ دوبارہ پوسٹ مارٹم انجام دیا گیا۔ایک لاش کے دوبارہ پوسٹ مارٹم کے لئے تقریبا دیڑھ گھنٹے کا وقت لگا۔ایک کے بعد دیگرے لاشوں کا پوسٹ مارٹم انجام دیاگیا اور ماہرین کی جانب سے ہر بات کو نوٹ کیاگیا۔بعد ازاں پولیس کے بھاری بندوبست کے درمیان لاشوں کو ان کے خاندانوں کے حوالے کردیاگیا۔
