نئی دہلی؍؍ قومی راجدھانی میں جان لیوا آلودگی سے نپٹنے کے لئے دہلی حکومت نے پیر کو الیکٹرک وہیکل پالیسی کا اعلان کیا۔وزیراعلی اروند کیجریوال نے پیر کو پریس کانفرنس میں بتایا کہ کابینہ نے الیکٹرک گاڑی پالیسی پر مہر لگا دی ہے ۔ انہوں نے کہاکہ اس پالیسی کا مقصد دہلی کو ملک کی الیکٹرک گاڑیوں کی راجدھانی بنانا ہے ۔مسٹر کیجریوال نے بتایا کہ راجدھانی میں ای۔ گاڑیوں کو فروغ دینے کے لئے حکومت سبسڈی دے گی۔ انہوں نے بتایا کہ پالیسی کو نافذ کرنے کے لئے الیکٹرک وہیکل بورڈ قائم کیا جائے گا۔وزیراعلی نے کہا کہ ہمارا ہدف 2024تک رجسٹر ہونے والی نئی گاڑیوں میں ایک چوتھائی الیکٹرک گاڑیاں ہے ۔ انہوں نے کہاکہ الیکٹرک وہیکل پالیسی کا پہلا خاکہ گزشتہ برس نومبر میں تیار کیا گیا تھا۔ اس خاکہ پر ملے ماہرین کے مشوروں کے بعد اسے حتمی شکل دی گئی۔ پالیسی پر مشورہ دینے والی ماہرین کے اداروں میں اقوام متحدہ ماحولیا ت پروگرام، صاف ستھرے نقل و حمل کے لئے بین الاقوامی کونسل اور ہندستانی صنعت کنفیڈریشن (سی آئی آئی) بھی شامل ہیں۔
