مسلمانوں کو کسی کے بہکاوے میں نہیں آنا چاہئے : شیعہ رہنما کلب جواد
یواین آئی
لکھنؤ؍؍شہریت ترمیمی قانون میں شکوک و شبہات پر شیعہ مذہبی رہنما مولانا کلب جواد نے کہا کہ اس قانون سے مسلمانوں کو کوئی خطرہ نہیں ہے ۔مذہبی رہنما نے ہفتہ کو یہاں کہا کہ مسلمانوں کو کسی کے بہکاوے میں نہیں آنا چاہئے ۔ یہ قانون شہریت دینے والا ہے ، کسی کی شہریت چھیننے والا نہیں۔ لہذا مسلمان کسی کے بہکاوے میں نہ آئیں اور اپنے صوابدید کا استعمال کریں۔ قانون کو لے کر کسی کو اگر کوئی وہم ہے تو اس کو اس کی جانکاری کے ساتھ ساتھ کوئی قدم اٹھانے سے پہلے ماہرین سے بات کرنی چاہئے ۔مولانا نے کہا کہ اس قانون کو لے کر کسی بھی قسم کے فساد سے سیاسی جماعتوں کو فائدہ ہو گا۔ انہوں نے بغیر کسی کا نام لیے کہا کہ کچھ سیاسی پارٹیاں قانون کے خلاف تحریک کے نام پر ملک میں تشدد کا ماحول بنا کر ملک میں عدم استحکام پیدا کرنا چاہتی ہیں۔ اس سے مسلمانوں کا نقصان ہوگا اور تحریک چلانے والی سیاسی پارٹیاں یہی چاہتی ہے کہ نقصان سے مسلمانوں کی ہمدردی حاصل کی جاسکے ۔اس درمیان بی جے پی کے ریاستی صدرسوتنتر دیو سنگھ نے بھی جمعہ کو مسلم مذہبی رہنماؤں سے ملکر لوگوں کو سمجھانے کی ان سے اپیل کی تھی۔
