شہریت بل کی مخالفت کرنے پر ممتا بنرجی کے خلاف کلکتہ ہائی کورٹ میں عرضی دائر
کلکتہ ؍؍شہریت ترمیمی بل ایکٹ اوراین آر سی کے خلاف وزیرا علیٰ ممتا بنرجی نے ایک بڑے جلوس کی قیادت کرتے ہوئے واضح اعلان کیا ہے کہ بنگال میں این آر سی ان کے لاش پر پاس ہوگا۔ وزیرا علیٰ ممتا بنرجی نے کہا کہ ہماری شہریت کسی کے بھی رحم و کرم پر نہیں ہے ۔ہم آزاد ملک کے شہری ہیں۔ممتا بنرجی نے وزیر اعظم نریندر مودی سے سوال کیا کہ وہ واقعی میں ہندوستانی شہری ہیں۔وزیرا علیٰ نے کہا کہ اس ملک میں آسامی، راجستھانی، بہاری اور سب مل کر کام کرتے ہیں۔وزیر اعلیٰ نے کہا کہ ہم سب ملک میں امن و امان چاہتے ہیں۔این آر سی اور کیپ کو رد کرتے ہیں۔ وزیر اعلیٰ ممتا بنرجی کی قیادت میں جلوس امبیڈکر سیتو سے شروع ہو ا جو ریڈ روڈ، میو روڈ،جواہر لال نہرو روڈ، ہوتے ہوئے جوڑا سانکو ٹھاکر باری پہنچا۔ممتا بنرجی نے کہا کہ کسی بھی صورت میں یہ متنازع قانون بنگال میں نافذ نہیں ہوگا۔ممتا بنرجی نے کہا کہ بنگال میں بڑے پیمانے پر احتجاج ہورہے ہیں اس کی وجہ سے کئی علاقوں میں ٹرین منسوخ کردیا گیا ہے ۔ممتا بنرجی نے کہا کہ بنگال کسی بھی صورت میں شہریت ایکٹ نافذ نہیں کرنے کے حق میں ہے ۔وزیرا علیٰ ممتا بنرجی نے مظاہرین سے اپیل کی پرامن ماحول میں احتجاج کریں،تشدد سے گریز کیا جائے ۔اس موقع پر بڑے پیمانے پر سیکورٹی انتظامات تھے ۔بنگال میں این آر سی اور شہریت سے متعلق نئے قانون کو بنگال میں نافذ نہیں کرنے پر مصر وزیر اعلیٰ ممتا بنرجی کے خلاف کلکتہ ہائی کورٹ میں مفاد عامہ کی عرضی دائر کی گئی ہے ۔وزیر اعلیٰ ممتا بنرجی کا اصرار ہے کہ شہریت سے متعلق قانون مرکز کا ہے اوریہ بنگال میں نافذ نہیں ہوگا۔اس سے قبل کیرالہ، مدھیہ پردیش، مہاراشٹرا، چھتس گڑھ نے بھی اس قانون کو نافذ نہیں کرنے کا اعلان کرچکی ہیں۔خیال رہے کہ بنگال کے گورنر جگدیپ دھنکر نے بھی شہریت سے متعلق نئے قانون کے خلاف وزیرا علیٰ ممتا بنرجی اور دیگر ریاستی وزراء کے احتجاج پر ناراضگی ظاہر کرتے ہوئے کہا کہ یہ بالکل غیر قانونی ہے ۔وہ یہ بات کیسے کہہ سکتی ہیں کہ یہ قانون مرکز کا ہے اور ریاست میں نافذ نہیں ہوگا۔سیاست اس سطح پر اتر کر نہیں کرنا چاہیے ۔سرجیت رائے چودھری نے کلکتہ ہائی کورٹ میں عرضی دائر کرتے ہوئے کہا ہے کہ مرکزی قانون کی ممتا بنرجی مخالفت کرکے آئینی تقاضوں کو پامال کررہی ہیں۔عرضی میں کہا گیا ہے کہ یہ صورت حال آئینی بحران کی طرف لے جاتا ہے ۔اس لئے چیف جسٹس کو اس معاملے میں مداخلت کرنی چاہیے ۔دوسری جانب وزیر اعلیٰ ممتا بنرجی نے آج نئے قانون کے خلاف مرکزی کلکتہ میں ایک بڑے جلوس کی قیادت کرتے ہوئے کہا ہے کہ یہ نیا قانون ہندوستان کے دستوری تقاضوں کے خلاف ہے اور ہم اس کی مخالفت کرتے رہیں گے ۔کسی بھی صورت میں بنگال میں نافذ نہیں ہونے دیا جائے گا۔
