کشمیرٹھٹھرتاکشمیربن گیاہے،اِن دِنوں سردیاں قہرڈھارہی ہیں،کشمیر میں گزشتہ تین دنوں سے جاری کڑاکے کی سردی اور گہری دھند نے اہلیان وادی کی زندگیاں اجیرن بنادی ہیں۔ ہفتہ اورایت کے روز بھی کڑاکے کی سردی اور گہری دھند سے معمولات زندگی متاثر ہوئے اور صبح کے وقت ڈرائیور حضرات نے سست رفتار سے چلنے کے باوجود بھی ہیڈ لائٹس چالو رکھی تھیں۔وادی میں شدید دھند کی وجہ سے فضائی ٹرانسپورٹ ہفتہ کو مسلسل دوسرے دن بھی متاثر رہا تاہم ریل سروس بغیر کسی خلل کے جاری وساری ہے۔سرینگر کے بین الاقوامی ہوائی اڈے پر دھند کے باعث ہفتے کے روز تمام پروازیں منسوخ ہوئیں جبکہ جمعہ کے روز دھند کی وجہ سے گیارہ پروازیں منسوخ ہوئی تھیں۔ایئر پورٹ ذرائع نے بتایا کہ گہری دھند کی وجہ سے ہفتہ کے روز تمام پروازوں کو منسوخ کیا گیا ۔کشمیر میں تعینات شمالی ریلوے کے ایئریا منیجر وپن پروہت نے کہا کہ وادی میں دو دنوں سے جاری گہری دھند سے ریل سروس پر کوئی اثر نہیں پڑا ہے تاہم شدید دھند سے کھبی کھبار ریل گاڑی کی رفتارمیں کمی واقع ہوسکتی ہے۔ادھر جہاں ایک طرف محکمہ موسمیات نے وادی میں 10 دسمبر سے 13 دسمبر تک میدانی و بالائی علاقوں میں بارشوں اور ہلکی بارف باری کی پیش گوئی کی ہے وہیں معالجین نے ‘صحت ایڈوائزری’ جاری کرکے لوگوں سے موسمی بیماریوں سے بچنے کے لئے علاج سے بہتر احتیاطی تدابیر برتنے کی تاکید کی ہے۔معالجین نے کہا ہے کہ شدید سردی کے پیش نظر عمر رسیدہ اور بچے باہر نکلنے سے احتراز ہی کریں۔ انہوں نے کہا کہ شدید سردی میں دل کے دورے پڑنے اور دماغ کی نس پھٹنے کے زیادہ امکانات ہیں۔وادی میں کڑاکے کی سردی تھمنے کا نام ہی لیتی ہے اور درجہ حرارت میں مزید کمی واقع ہونے سے سری نگر میں صبح کے وقت نل اور آبی ذخائر منجمد ہوچکے تھے۔شدید سردی کے پیش نظر بچوں کو صبح کے وقت اسکول جانے میں سخت دشواریوں سے دوچار ہونا پڑرہا ہے۔انتظامیہ کو چاہئے کہ وہ سردی کے پیش نظر اسکولوں میں گرمی کے خاطر خواہ انتظام کرے اور چھوٹے بچوں کے لئے سرمائی تعطیلات کا اعلان کرے۔محکمہ صحت کو بھی بیداری ہونے کی ضرورت ہے، ایل جی کے صلاحکاروں کو متحرک رہناچاہئے اور ان سختی کے ایام میں وادی کشمیرکے عوام کو بنیادی سہولیات اور اشیائے ضروریہ کی فراہمی یقینی بنائی جانی چاہئے۔
