پلوامہ کے لوگوں کی مایوسی اور نا امیدی اچھی طرح سمجھ اور دیکھ سکتا ہوں:عمر عبداللہ
یواین آئی
پلوامہ نیشنل کانفرنس کے نائب صدر عمر عبداللہ نے کہا ہے کہ میں پلوامہ کے لوگوں کا غم و غصہ، مایوسی اور نا امیدی اچھی طرح سمجھ اور دیکھ سکتا ہوں، یہاں کے عوام کو گذشتہ ساڑھے 4 سال کے دوران دھوکہ، فریب، خون خرابہ، مارپیٹ، ظلم و تشدد، جبر و استبداد، دکھ درد اور سختی کے علاوہ کچھ نہیں ملا۔ان باتوں اظہار انہوں نے جنوبی کشمیر کے لئے نیشنل کانفرنس کے نامزد امیدوار جسٹس حسنین مسعودی کے حق میں جاری چناوی مہم کے دوران بدھ کے روز مجاہد منزل پلوامہ میں پارٹی کارکنوں اور عہدیداروں سے خطاب کرتے ہوئے کیا۔انہوں نے کہا ‘پلوامہ کے ساتھ گذشتہ4سال کے دوران کیا ہوا وہ کوئی ڈھکی چھپی بات نہیں، لیکن آپ کا قصور کیا تھا؟کیا آپ نے 2014کے الیکشن میں بڑھ چڑھ کر حصہ نہیں لیا؟ کیا آپ لوگوں نے ووٹ نہیں ڈالے ؟ فرق اتنا ہی ہے کہ جن لوگوں کو آپ نے منڈیٹ دیا انہوں نے آپ کے ووٹوں کا استعمال آپ کے فائدے اور ریاست کے فائدے کے لئے نہیں کیا بلکہ ان لوگوں نے آپ کے ووٹ کا استعمال اپنا اقتدار اور کرسی بچانے کے لئے کیا اور عوام کو حالات کے رحم ر کرم پر چھوڑ دیا، آپ نے پی ایس ایس اے کے لئے ووٹ نہیں ڈالے تھے ، آپ نے ووٹ پیلٹ گن کے لئے نہیں ڈالے تھے ، آپ نے ٹیئر گیس اور گولیوں کے لئے بھی ووٹ نہیں ڈالے تھے ، آپ نے ووٹ اس لئے نہیں ڈالے تھے کہ آپ کے اُستاد کو سری نگر لے جاکر زیر حراست ہلاک کیا جائے ‘۔عمر عبداللہ نے کہا کہ پلوامہ کے ساتھ گذشتہ 4سال کے دوران جو ہوا اُسی کا نتیجہ ہے کہ یہاں ہر طرف مایوس نظر آرہی ہے اور ایسا محسوس ہورہاہے کہ یہاں کے لوگوں کا اس الیکشن کے ساتھ دور کا بھی واسطہ نہیں۔ لیکن یہ بہت بڑی ناانصافی ہوگی اگر یہاں کے لوگوں نے ووٹ کا استعمال کرکے اپنی ناراضگی کا اظہار نہیں کریں گے ۔انہوں نے پلوامہ کے لوگوں سے اپیل کرتے ہوئے کہا کہ وہ اپنی ناراضگی کا اظہار اپنے ووٹ کے ذریعے کریں۔تاکہ دلی کو یہ پیغام جاسکے کہ گذشتہ ساڑھے 4سال کے دوران جو ظلم یہاں ہوا وہ ہمیں برداشت نہیں۔عمر نے کہا ‘ہم چاہتے ہیں کہ آپ کی آواز دلی کے اُس ایوان میں بلند ہو جہاں پر ہم ظلم کے لئے جواب حاصل کرسکیں۔جو رات کو کریک ڈاﺅن ہوتے ہیں، جو گرفتاریوں ہوتی ہیں، جو یہاں نوجوانوں پر پی ایس اے عائد کیا جاتا ہے ، جو ہمارے نوجوانوں کا انٹروگیشن ہوتا ہے ،ان چیزوں کا کہیں نہ کہیں سے تو جواب حاصل کرنا ہوگا’۔عمر عبداللہ نے کہا کہ موجودہ الیکشن ہمارے پا س ایک ایسا موقعہ ہے کہ جس کے ذریعے ہم دلی کو یہ پیغام بھیج سکتے ہیں کہ اُن کی سازشیں، اُن کا دھوکہ، اُن کا فریب اور اُن کا ظلم و ستم ہم برداشت نہیں کرسکتے ۔ اس الیکشن میں ہم ایسا نمائندہ چن سکتے ہیں جو دلی جاکر یہ کہہ سکے کہ ‘اب اور نہیں، یہ ظلم، یہ سختی، یہ کریک ڈاﺅن، یہ کرفیو، یہ پیلٹ گن، یہ گولیاں، یہ گرفتاریاں، یہ پی ایس اے اور یہ حراستی ہلاکتیں بند کیجئے ‘۔نائب صدر نے کہا کہ پلوامہ ایک ایسا علاقہ ہے جس نے کبھی فرقہ پرستی میں یقین نہیں رکھا، جب 2016کے نامساعد حالات میں یاتریوں کی ایک گاڑی کو حادثہ پیش آیا تو یہاں کے نوجوانوں نے نہ صرف بچا[؟] کارروائی کی بلکہ ان یاتریوں کو ہسپتال پہنچایا اور خون کا عطیہ بھی فراہم کیا۔ پلوامہ کے لوگوں نے اپنے پنڈت بھائیوں کو مندر کی تعمیر نو میں بھر پور مدد و اعانت کرکے صدیوں کے بھائی چارے کی علم کو فیروزاں رکھا۔ لیکن آج چند عناصر اسی پلوامہ کو بدنام کرنے پر تلے ہوئے ہیں۔عمر عبداللہ نے کہا کہ پلوامہ کے نوجوان ایک بہتر مستقبل کی تلاش میں ہوا کرتے تھے ، یہاں امن و امان کا ماحول تھا، بھائی چارہ قائم و دائم تھا، لوگ عزت کی روٹی کمانے میں مصروف تھے لیکن 2015میں پی ڈی پی نے جونہی بھاجپا کیساتھ اتحاد کیا اس علاقے پر جیسے آفت ٹوٹ پڑی۔ اُس دن سے لیکر آج تک مصائب اور مشکلات اس علاقہ سے جانے کا نام نہیں لے رہے ہیں۔ پی ڈی پی کو منڈیٹ دینا یہاں کے لوگوں کو زبردست مہنگا ثابت ہوا۔اس موقعے پر پارٹی کے صوبائی صدر ناصر اسلم وانی، سینئر لیڈران میر سیف اللہ، بشارت بخاری، شمی اوبرائے ، تنویر صادق، ڈاکٹر محمد شفیع، غلام نبی رتن پوری، غلام محی الدین میر ، جاوید رحیم بٹ، سید رفیق احمد شاہ ، رفیق احمد خان اور ماسٹر عبدالعزیز بھی موجو دتھے ۔
