دہشت گردوں اور غداران وطن کو چوکیدار نہیں چھوڑے گا :مودی
یواین آئی
گریڈیہہ ( جھارکھنڈ) وزیراعظم نریندرمودی نے آج ایک بار پھر قومیت کا مسئلہ اٹھایا اورلوگوں کو یقین دلایا کہ پاکستان کے دہشت گرد وں یا ملک کے اندر غداران وطن ‘ ‘ چوکیدارکسی کو نہیں چھوڑے گا۔بھارتیہ جنتا پارٹی ( بی جے پی ) کے سینئر لیڈر مسٹر مودی نے یہاں جموا میں قومی جمہوری اتحاد ( این ڈی اے ) امیدواروں کے حق میں منعقدانتخابی جلسہ کو خطاب کرتے ہوئے کہاکہ ایئر اسٹرائیک اور سرجیکل اسٹرائیک کے بعد جہاں کہیں بھی خطرہ ہوگا ہندوستان گھس کر مارے گا۔ انہوںنے کہاکہ پاکستان کے دہشت گرد وں یا ملک کے غدار وطن آپ کا یہ چوکیدارکسی کو نہیں چھوڑے گا۔ وزیراعظم نے کہاکہ کانگریس نے اس بار اس کی یا اس کی مدد سے بننے والی کسی بھی حکومت میں غدار وطن قانون کو ختم کرنے کا اعلان کیا ہے ۔ کانگریس کے اس وعدہ سے نکسلیوں کو مدد کرنے والے لوگوں کے خلاف کاروائی کرنے میں کا مشکلات پیش آئیں گی ۔ انہوںنے کہاکہ کانگریس نے یہ اعلان کرکے اپنا کردار اجاگر کر دیا ہے ۔مسٹر مودی نے کانگریس اور مہا گٹھ بندھن کی حلیف جماعتوں پر حملہ کرتے ہوئے کہاکہ بغیر لوٹ ۔ کھسوٹ کے ایمانداری اور صاف نیت سے انہوںنے حکومت چلائی جس سے ملک ترقی کر رہاہے ۔ ایسا اس لئے ممکن ہو سکا کیونکہ پورا ملک چوکیدار کے ساتھ کھڑا ہے ۔انہوں نے کہاکہ مہا ملاوٹی اس بار مرکز میں حکومت بنانا چاہتے ہیں۔ یہ ویسے لوگ ہیں جو کروڑوں کے وارے نیارے کر چکے ہیں اور ان کا عزم صرف ان کے کنبہ کے لئے ہی ہے ۔ انہوںنے کہاکہ اپوزیشن نہیں چاہتا کہ مضبوط اور مکمل اکثریت والی حکومت بنے ۔بی جے پی لیڈر نے کہاکہ یہ وزیراعظم اٹل بہاری واجپئی کی حکومت تھی جس نے کوڈرما ۔ رانچی ریلوے لائن منصوبہ کومنظور دی تھی لیکن اس کے بعد مرکز کی متحدہ ترقی پسند اتحاد ( یو پی اے ) حکومت میں دس سال تک اس منصوبہ کاکام زیر التوا رہا ۔ انہوںنے کہاکہ سال 2014 میں عوام نے مرکز میں بی جے پی کی حکومت بنائی اور کوڈرما ۔ ہزاری باغ ۔ برکاکانہ ۔ سدھوار ریل سیکشن کاکام پورا کرلیا گیا اور آئند ہ ایک ڈیڑھ سال میں اس ریل سیکشن کو رانچی سے جوڑ دیاجائے گا۔مسٹر مودی نے کہاکہ حکومت صرف ریل سیکشنوں کی تعمیر نہیں کر رہی ہے بلکہ وہ ان پٹریوں پر ٹرینوں کی رفتار بڑھانے کی سمت میں بھی تیزی سے کام کر رہی ہے اور اس کے لئے مشرقی کاریڈور کی تعمیر کرائی جارہی ہے ۔ انہوںنے کہاکہ اب یہاںکے لوگ محض کچھ گھنٹوں میں ہی کوڈرما سے گریڈیہہ اور دیو گھر پہنچ سکتے ہیں جبکہ پہلے اس روٹ پر سفر کرنے میں کافی وقت لگتا تھا۔وزیراعظم نے کہاکہ ملک میں دیگر پسماندہ طبقہ ( او بی سی ) کمیشن کو آئینی درجہ دیئے جانے کا مطالبہ کافی عرصے سے ہوتارہا ہے لیکن اپوزیشن اس کی راہ میں ہمیشہ روڑا اٹکاتا رہا جبکہ ان کی حکومت نے تمام بندشوں کو توڑ کر اس کمیشن کو آئینی درجہ عطا کیا ہے ۔انہوںنے کانگریس پر الزام عائد کرتے ہوئے کہاکہ اپوزیشن جماعت کبھی بھی کسی کیلئے وفادار نہیں رہی ۔ جو حلقے ان کے لئے ووٹ بینک نہیں بن سکے ان علاقوں کی ترقی ہی نہیں کی اور ایسا ہی کچھ جھارکھنڈ کے غریب قبائیلیوں کے ساتھ بھی ہوا ہے ۔مسٹر مودی نے کہاکہ ان کی حکومت نے کوڈرما اور چائباسا میں میڈیکل کالج ، دیوگھر میں آل انڈیا انسٹی چیوٹ آف میڈیکل سائنس ( اے آئی آئی ایم ایس )گریڈیہہ میں ماڈل کالج کی تعمیرکے ساتھ ہی دور دراز دیہی علاقوں میں ہیلتھ اور ویلنیس سینٹر کی تعمیرکرائی ہے ۔ انہوںنے کہاکہ آیوشمان بھارت منصوبہ سے جھارکھنڈ کے لوگوں کو کافی فائدہ ملے گا۔انہوںنے کہاکہ مرکزکے تمام منصوبوں کا ایک واحد مقصد لوگوں کی خود اعتمادی میں اضافہ کرنا اور انہیں غریبی کے دلدل سے باہرنکالنا ہے ۔ اس کے لئے ان کی حکومت میں غریبوں کو نہ صرف رہائش فراہم کی گئی بلکہ انہیں بیت الخلااور صحت سہولیات بھی دستیاب کرائے گئے ہیں ۔وزیراعظم نے دعویٰ کیاکہ 23 مئی 2019 کو ان کی حکومت ایک بار پھر اقتدار میں آئے گی اور تب وزیراعظم کسان سمان نیدھی منصوبہ کا فائدہ ملک کے سبھی کسانوں کو مہیا کرادیاجائے گا۔مسٹر مودی نے شہید جوانوں کو سلام کیا اور کانگریس کی حلیف کرناٹک کے وزیراعلیٰ ایچ ڈی کمار سوامی کے فوج کے جوانوں پر کئے گئے تبصرہ پر سخت حملہ کرتے ہوئے لوگوں سے پوچھا مسٹر کمار سوامی کا یہ بیان فوج اور مادر وطن کی بے عزتی ہے یا نہیں ۔ آرمی چیف کو گلی کا غنڈا بتانے والی کانگریس کو ووٹ دینا چاہئے یا نہیں ۔غورطلب ہے کہ مسٹر کمار سوامی نے ابھی حال ہی میں کہا تھاکہ فوج میں ویسے ہی لوگ جاتے ہیں جنہیں دو وقت کا کھانا نصیب نہیں ہوتاہے ۔وزیراعظم نے کہاکہ جھارکھنڈ نے بے ایمان حکومت کی مدت کارکو بھی دیکھا ہے ۔ یہا ں پر وزیراعلیٰ کو جیل جانا پڑا ہے جبکہ بی جے قیادت والی این ڈی اے حکومت میں ریاست کی بہتر ترقی ہوئی ہے ۔ انہوںنے کہاکہ سابقہ حکومتوں نے پسماند طبقوں کو صرف پسماندہ بنا کر رکھا لیکن بی جے پی حکومت نے ریاست کے قبائلی بھائیوں بہنوں کے لئے بھی کئی ترقیاتی کاموں کو زمین پر اتارا ہے ۔مسٹر مودی نے کہاکہ جھارکھنڈ کے جن گاﺅں میں لال دہشت ( نکسلیوں ) کا خوف دکھتا تھا وہاں اب لوگ سڑکوں پر گاڑیوںسے آنے جانے لگے ہیں۔ انہوںنے کہاکہ اجلاس میں بیٹھے کئی ایسے افرادہیں جو گریڈیہہ اور کوڈرما ضلع کے دوردرازحلقوں میں جانے سے ڈرتے تھے لیکن بی جے پی حکومت نے نہ صرف نکسلیوں کا صفایا کیا بلکہ ان علاقوںمیں ترقیاتی منصوبوں کو بھی زمین پر اتاراہے ۔بی جے پی لیڈر مسٹر مودی نے لوگوں سے کوڈرما میں کمل پھول پر اورگریڈیہہ میں کیلا ( این ڈی کی حلیف آجسو کا انتخابی نشان ) کو ووٹ دے کر این ڈی امیدواروں کو زیادہ سے زیادہ ووٹوں سے کامیاب بنانے کی اپیل کی ۔انہوں نے کہاکہ لوگوںکے ایسا کرنے سے مرکز میں ایک بار پھر مضبوط حکومت بنے گی ۔ مسٹر مودی نے کہاکہ انہیں اس بات کا احساس ہے کہ سخت گرمی کے باوجود آج جھارکھنڈ کی تین سیٹوں لوہردگا ، پلامواورچترا میں ووٹنگ کرنے کیلئے کثیر تعدادمیں لوگ نکلے ہیں ۔ انہوںنے کہاکہ بی جے پی کی ریلیو ں میں لوگوںکے شامل ہونے کی تعداد نے ریکارڈ بنا دیا ہے لیکن آئندہ ہونے والی ریلیوںمیں اس سے بھی زیادہ تعدادمیں پہنچ کر نئے ریکارڈ بنانے کی ضرورت ہے ۔اجلاس میں بی جے پی کے سینئر لیڈر اور جھارکھنڈ کے وزیراعلیٰ رگھور داس ، جھارکھنڈ میں لوک سبھا الیکشن انچارج اور بہارکے وزیر صحت منگل پانڈے ، کوڈرما کے موجودہ ایم پی رویندرکمار رائے اورگریڈیہہ کے موجودہ ایم پی رویندر پانڈے سمیت معززلیڈران اور بڑی تعدادمیں لوگ موجود تھے ۔
