ہم خطہ جموں کی دونوں پارلیمانی نشستیں جیتیں گے: غلام احمد میر
یواین آئی
جموں جموں وکشمیر پردیش کانگریس کمیٹی کے صدر غلام احمد میر نے کہا کہ سن 2014 میں پیدا کی گئی مودی لہر ختم ہوچکی ہے۔ انہوں نے کہا کہ کچھ ٹی وی چینل کو چھوڑ کر وزیر اعظم مودی زمینی سطح پر کہیں بھی زندہ نہیں ہیں۔ غلام احمد میر نے یہ باتیں منگل کے روز یہاں نامہ نگاروں کے سوالات کا جواب دیتے ہوئے کہیں۔ انہوں نے کہا ’سن 2014 میں جو لہر پیدا کی گئی وہ ختم ہوچکی ہے۔ بڑے بڑے پیڑ اکھاڑنے کی بات کی گئی تھی۔ اگر آج پی ایم مودی کہیں زندہ ہیں تو وہ کچھ ٹی وی چینل پر۔ مگر زمینی سطح پر مودی کا صفایا ہوچکا ہے‘۔ ریاستی کانگریس صدر نے کہا کہ کانگریس خطہ جموں کی دونوں پارلیمانی نشستوں پر جیت درج کرے گی۔ ان کا کہنا تھا ’جموں کی دو نشستوں پر کانگریس کے امیدواروں کو نیشنل کانفرنس کی بھرپور حمایت حاصل ہوگئی ہے۔ مجھے صد فیصد یقین ہے کہ جموں کی دونوں نشستیں کانگریس کی جھولی میں جائیں گی‘۔ یہ پوچھے جانے پر کہ ’کیا نیشنل کانفرنس اور کانگریس اسمبلی انتخابات کے لئے بھی اتحاد کریں گی‘، تو مسٹر میر کا جواب تھا’ہم پہلے ریاست میں لوک سبھا کی چھ سیٹیں دلی بھیجیں گے۔ جب یہ تجرہ کامیاب ہوگا تو اسمبلی کی باتیں ہوں گی۔ فی الحال جو طرفین کے درمیان اتحاد ہوا ہے، وہ صرف لوک سبھا کے لئے ہے‘۔
