پانچ رہائشی مکانوں کو شدید نقصان پہنچا ،دو زمین بوس،کئی سڑکوں پر آمد و رفت متاثر
حفیظ قریشی
کٹھوعہ // ضلع کے متعدد علاقوں میں خراب موسمی صورتحال کے درمیان تیز ہواؤں اور شدید بارشوں سے کئی رہائشی مکانوں، عمارتوں کو نقصان پہنچا ہے۔آخری اطلاع کے مطابق ضلع کی پہاڑی سب ڈویژن بنی میں قبل دو روز سے تیز ہواؤں اور بارشوں سے پانچ رہائشی مکانوں کو شدید نقصان پہنچا ہے ۔عمارتوں کی چھتیں تیز ہوا کی وجہ سے اکھڑ گئی ہیں جبکہ دو مکان زمین بوس ہوئے ہیں اور گھر کے اراکین معجزاتی طور سے بچ گئے ۔غنیمت رہی کے ان حادثوں میں کوئی بھی جانی نقصان نہیں ہوا ہے۔
تاہم بھاری بارشوں سے ضلع میں کئی علاقوں میں زرعی اراضی کو بھی نقصان پہنچا ہے تاہم سب سے زیادہ اثر اراضی کو بنی اور لوہائی ملہار کا علاقے میں ہوا ہے۔جبکہ شدید بارشوں کے باعث ضلع ہیڈ کوارٹر جوڑنے والی بنی اور لوہائی ملہار علاقے کی متعدد رابطہ سڑکیں بند ہوگئی ہیں۔ ان سڑکوں پر بڑے بڑے پتھر اور ملبے کے گر آنے سے یہ سڑکیں بند ہیں جس میں بنی بسوہلی اور لوہائی ملہار، بلاوار سڑکیں شامل ہیں جسکے باعث سڑکوں پر ٹریفک کی آمدورفت ماند ہو کر رہ گئی ہے۔
