تقریب میں جموںوکشمیر فلم پالیسی کے اہم پہلوئوں کی نمائش کی گئی
لازوال ڈیسک
گوا؍؍ڈائریکٹوریٹ آف اِنفارمیشن اینڈ پبلک ریلیشنز (ڈی آئی پی آر)جموںوکشمیر 20 سے 28 ؍نومبر 2023ء تک گوا میں منعقد ہونے والے 54 ویں سالانہ اِنٹرنیشنل فلم فیسٹول اِنڈیا (آئی ایف ایف آئی) اوراین ایف ڈی سی فلم بازار کے 17 ویں ایڈیشن میں شرکت کر رہا ہے۔فیسٹول میں روس، کینیڈا، برطانیہ، جنوبی افریقہ سمیت متعدد ممالک کے بین الاقوامی فلم شراکت دار شرکت کر رہے ہیں۔ جموں و کشمیر، مہاراشٹر،مدھیہ پردیش، گجرات، بہار، اُتراکھنڈ، اور چھتیس گڈھ بھی اس عظیم الشان تقریب میں حصہ لے رہے ہیں۔تقریب کے دوسرے دِن ڈی آئی پی آر ٹیم نے جموں و کشمیر فلم پالیسی کے نوڈل آفیسر کی قیادت میں این ایف ڈی سی فلم بازار کے 17 ویں ایڈیشن میں سرگرمی سے حصہ لیاجو فلمی پیشہ ور اَفراد کے لئے ایک ضروری بازار ہے جس سے تعاون اور تقسیم کے مواقع پیدا ہوئے۔ یہ ٹیم برطانیہ، روس، جنوبی کوریا اور دیگر جیسے ممالک کے معروف بین الاقوامی فلم سازوں کے ساتھ ساتھ ہندوستان کے نامور فلم سازوں اور انڈین موشن پروڈیوسرز ایسوسی ایشن، پی ایچ ڈی چیمبر آف کامرس اینڈ انڈسٹری نئی دہلی، انڈین ٹیلی ویژن اکیڈمی کے نمائندوں کے ساتھ فلم بازار کے جموں و کشمیر کے سٹال پر سرگرمی سے کام کیا۔ڈی آئی پی آر کی ٹیم نے بات چیت کے دوران جموں و کشمیر فلم پالیسی کے اہم پہلوؤں پر روشنی ڈالی اور ان کے سوالات کو تن دہی سے حل کیا۔جموں و کشمیر فلمی مقامات میں سے ایک ہے جہاں 23 ؍نومبر جموں و کشمیر کے لئے فوکس ڈے ہے ۔ ڈی آئی پی آر اس دن نئی جموں و کشمیر فلم پالیسی اور فلم سیاحتی مقامات کو پیش کرے گا اور سرگرمیوں میں پینل ڈسکشن، پرزنٹیشنوں اور فلم پالیسی کے بارے میں ویڈیوز سکریننگ اور جموں و کشمیر میں شوٹنگ کی جانے والی فلمیں شامل ہوں گی۔ٹیم کی نمائندگی جوائنٹ ڈائریکٹرڈی آئی پی آر وویک پوری ، نوڈل آفیسرجموں و کشمیر، فلم پالیسی، آفاق گدا، اے او، ڈی آئی پی آر ہتیش چودھری، ٹورسٹ آفیسرحیدرآبادمحمد ساجد کرمانی اور فلم لائبریرین عابد حسین کررہے ہیں۔یہ بات قابل ذِکر ہے کہ ملٹی وینیو فیسٹول کی میزبانی مرکزی وزارت اطلاعات و نشریات کر رہی ہے اور اس کا اِفتتاح اطلاعات و نشریات کے وزیر انوراگ ٹھاکر نے کیا تھا۔ فیسٹول میں ملک اور بیرون ملک سے فلم ساز اور فنکار شامل ہیں۔
