سری نگر،//جموں وکشمیر کی گرمائی راجدھانی سری نگر میں دستگیر صاحب خانیار کے آستانہ عالیہ پر پیر کے روز نواسہ حضرت شیخ سید عبدالقادرجیلانی (رح) سید ہاشم گیلانی نے حاضری دی اور امن و سلامتی کے لئے خصو صی دعا ۔
وقف بورڈ کی چیئرپرسن ڈاکٹر درخشاں اندرابی اور سیکریٹری ٹورازم عابد شاہ نے سید ہاشم گیلانی کا آستانہ عالیہ پر استقبال کیا ۔
سید ہاشم گیلانی کو دیکھنے کے لئے لوگوں کی ایک بڑی تعداد دستگیر صاحب خانیار میں صبح سے ہی انتظار کر رہی تھی۔
اطلاعات کے مطا بق کشمیر کے دورے پر آئے ہوئے نواسہ حضرت شیخ سید عبدالقادر جیلانی (رح ) سید ہاشم گیلانی نے پیر کے روز پیر دستگیر صاحب کے آستانہ عالیہ واقع خانیار میں حاضری دی ۔
معلوم ہوا ہے کہ سید ہاشم گیلانی کی دستگیر صاحب خانیار میں آمد کے پیش نظر سیکورٹی کے غیر معمولی انتظامات کئے گئے تھے۔
آستانہ عالیہ پر حاضری کے بعد نامہ نگاروں سے مختصر بات چیت کے دوران سید ہاشم گیلانی نے کہاکہ یہاں پر آکر بہت خوشی ہوئی اور عالم انسانیت کے لئے دعاکی۔
وقف بورڈ کی چیئرپرسن ڈاکٹر درخشا ں اندرابی نے اس موقع پر کہاکہ نواسہ حضرت شیخ سید عبدالقادر جیلانی (رح ) نے دستگیر صاحب آستانہ عالیہ پر حاضری دی اور کشمیر میں امن و ترقی اور خوشحالی کی دعا کی۔ انہوں نے بتایا کہ اس سے ایک اچھا پیغام جائے گا ۔
درخشاں اندرابی نے بتایا کہ منگل کے روز وقف بورڈ کی جانب سے نئے لاگو کی رسم رونمائی نواسہ دستگیر صاحب کے ہاتھوں ہی ہوگی ۔
دریں اثنا دستگیر صاحب خانیار سری نگر میں نواسہ شاہ جیلانی (رح) کو دیکھنے کے لئے لوگوں کی ایک بڑی تعداد امڑ پڑی تھی ۔
واضح رہے کہ سید ہاشم گیلانی بغداد سے تین روز ہ دورے پر کشمیر وارد ہوئے ہیں ، اتوار کے روز انہوں نے شاہ جیلان کانفرنس میں بھی شرکت کی تھی ۔
