بھاجپا رام راجیہ کی بات کرتی ہے لیکن عوام سے کیا گیا ایک بھی وعدہ پورا نہیں کیا :سولنکی
حفیظ قریشی
کٹھوعہ؍؍ اے آئی سی سی کے سینئر لیڈر اور جموں و کشمیر کے امور کے انچارج بھرت سنگھ سولنکی نے آج بی جے پی کو نشانہ بناتے ہوئے کہا کہ یہ رام راجیہ کی بات کرتی ہے لیکن عوام سے کیا گیا ایک بھی وعدہ پورا نہیں کیا جو بدترین قسم کی مہنگائی اور بے روزگاری کی زد میں ہیں۔ آج یہاں ضلع کانگریس کمیٹی کے ایک متاثر کن ورکرز کنونشن سے تبادلہ خیال کرتے ہوئے سولنکی نے کالا دھن لانے اور عام آدمی کے کھاتے میں 15 لاکھ جمع کرانے، مہنگائی کو روکنے اور سالانہ دو کروڑ نوکریاں دینے کے لیے لوگوں سے وعدہ کرنے پر بی جے پی کو آڑے ہاتھوں لیا اور کہا کہ بھاجپا نے اپنے وعدوں کو پورا نہیں کیا جو رام راجیہ کے اصولوں کے خلاف ہے۔ سولنکی نے کہا کہ ڈاکٹر منموہن سنگھ کی قیادت والی یو پی اے حکومت نے جموں و کشمیر سمیت ملک کے ہر طبقے میں مجموعی ترقی کی ہے لیکن بی جے پی نے ہر اچھے قدم کی مخالفت کی۔ قیمتوں میں معمولی اضافے کے لیے بی جے پی لیڈر سڑکوں پر ہوتے تھے لیکن اب ان مسائل پر بات نہ کرتے جب لوگوں کو بدترین مشکلات کا سامنا ہے۔انہوں نے کہا کہ جموں و کشمیر کے لوگوں کو زمین، ملازمتوں اور قدرتی وسائل کے حقوق اور ریاستی حیثیت سے من مانی طور پر محروم رکھا گیا۔ سولنکی نے کہا کہ جموں و کشمیر کے لوگ لداخ کی پیروی کریں گے جنہوں نے ریاستی حیثیت اور اپنے حقوق اور ثقافتی شناخت کے تحفظ کے لیے ایک مضبوط تحریک چلا کر آگے بڑھنے کا راستہ دکھایا ہے۔انہوں نے کٹھوعہ کے لوگوں پر زور دیا کہ وہ تبدیلی کا ایک بڑا جھونکا دیں اور کانگریس کو اقتدار میں لائیں کیونکہ انہوں نے یہاں راہل گاندھی جی کی پد یاترا کا پرتپاک خیرمقدم کیا جو عام لوگوں کو انصاف کے لیے لڑ رہے ہیں۔ ان کے ساتھ جے کے پی سی سی کے صدر وقار رسول وانی، اے آئی سی سی سکریٹری منوج یادو، کارگزار صدر رمن بھلا، سینئر نائب صدر رویندر شرما، نائب صدر پرنب شگوترا، جنرل سیکرٹری ششی شرما، نریش شرما، ضلع صدر پنکج ڈوگرا، شمیما رینا، آکاش بھارت اور دیگر بھی موجود تھے۔ وہیں جے کے پی سی سی کے صدر وقار رسول وانی نے جموں و کشمیر کے لوگوں خاص طور پر نوجوانوں اور کسانوں کے لیے بہت سے مصائب لانے کے لیے بی جے پی کو تنقید کا نشانہ بنایا اور کہا کہ بے روزگاری، ٹیکس دہشت گردی ہے جبکہ کسان زمینوں سے محروم ہیں۔ انہوں نے کہا کہ عوام برسوں سے جمہوریت سے محروم ہیں اور عوام کی آواز نہیں سنی جاتی۔اس موقع پر رمن بھلا نے جموں کے لوگوں کی امنگوں کی نمائندگی کرنے میں ناکامی پر بی جے پی کو نشانہ بنایا۔
