پونچھ ۔ راجوری میں ہو رہی ترقی ہمارے ہمسایہ ملک کو ہضم نہیں ہوئی:لیفٹیننٹ جنرل دیویدی
یواین آئی
سری نگر؍؍ فوج کی شمالی کمان کے کانڈر لیفٹیننٹ جنرل اوپندرا دیویدی نے کہا کہ پونچھ اور راجوری میں ترقی ہو رہی تھی جو ہمارے پڑوسی ملک کو ہضم نہیں ہوئی۔ان کا ساتھ ہی کہنا تھا: ‘یہی وجہ ہے کہ انہوں نے اس علاقے میں ملی ٹنسی کو بڑھا وا دیا’۔موصوف لیفٹیننٹ جنرل نے ان باتوں کا اظہار اتوار کو یہاں نامہ نگاروں کے ساتھ بات کرنے کے دوران کیا۔انہوں نے کہا: ‘گذشتہ کئی برسوں سے پونچھ – راجوری علاقے میں ترقی ہو رہی تھی یہاں سرمایہ کاری ہو رہی تھی اور لوگوں کو نوکریاں مل رہی تھی’۔ان کا کہنا تھا: ‘یہ ترقی ہمارے پڑوسی ملک کو ہضم نہیں ہوئی اور انہوں نے یہاں ملی ٹنسی کو بڑھا وا دیا لیکن ہم اس کے خلاف سخت کا رروائی کر رہے ہیں اور اس کو جلد قابو میں کیا جائے گا’۔مسٹر دیویدی نے کہا کہ شمالی سرحدی علاقوں میں استحکام ہے لیکن یہ علاقہ حساس ہے۔انہوں نے کہا: ‘ہم نے سال 2023 کو زیرو در اندازی سال قرار دیا کیوںکہ اس سال کے دوران لائن آف کنٹرول پر کوئی در اندازی نہیں ہوئی’۔ان کا کہنا تھا: ‘ہم نے اس سال جتنے دہشت گرد مارے ان میں سے 21 مقامی جبکہ 55 غیر ملکی تھے جس سے یہ معلوم ہوتا ہے کہ ریکروٹمنٹ میں کمی واقع ہوئی ہے’۔لیفٹیننٹ جنرل نے کہا کہ سال 2022 میں 121 ریکروٹمنٹس ہوئی تھی جبکہ اس سال صرف 19 ریکروٹمنٹس ہوئی ہیں۔
