ریٹلی ہائیڈرو الیکٹرک پاور پروجیکٹ سائٹ میں روڈ سیفٹی بیداری پروگرام منعقد
بابر فاروق
کشتواڑ// روڈ سیفٹی کو فروغ دینے کی کوششوں کو جاری رکھتے ہوئے محکمہ موٹر وہیکل کشتواڑ نے ضلع کشتواڑ کے درابشالہ میں جاری ریٹلی ہائیڈرو الیکٹرک پاؤر پروجیکٹ کے زیرو پوائنٹ کے مقام پر ایک مؤثر بیداری پروگرام کا انعقاد کیا۔قومی روڈ سیفٹی ماہ 2024 کے سلسلے میں منعقد ہونے والی اس تقریب میں دو سو سے زائد ڈرائیوروں اور مقامی شہریوں نے شرکت کی، جس کا مقصد ڈرائیوروں کو محفوظ طریقوں اور ذمہ دارانہ ڈرائیونگ کے بارے میں آگاہی فراہم کرنا تھا۔ اے آر ٹی او کشتواڑ محمد سلیم منہاس کی نگرانی میں اور ضلع چیئرمین روڈ سیفٹی کمیٹی ڈاکٹر دیونش یادؤ کی ہدایت کے مطابق اس پروگرام نے روڈ سیفٹی کے اہم پہلوؤں کو کامیابی کے ساتھ حل کیا۔مشترکہ کوششوں میں ڈرائیوروں کے لیے ایک مفت میڈیکل اسکریننگ کیمپ شامل بھی منعقد کیا گیا جو طبی عملے کے اشتراک سے منعقد کیا گیا جس میں ایک سو سے زائد ڈرائیوروں کی مفت اسکریننگ کی گئی۔ اس کے علاوہ اس موقع پر بیداری ریلی زیرو پوائنٹ سے لے کر درابشالہ بازار تک نکالی گئی۔ منعقدہ کیمپ کا مقصد ڈرائیوروں کی صحت کا جائزہ لینا تھا، خاص طور پر آنکھوں کی بینائی پر توجہ مرکوز کرنا، اس بات کو یقینی بنانا کہ وہ محفوظ ڈرائیونگ کے لیے موزوں ہیں۔آگاہی پروگرام میں اہم حفاظتی اقدامات پر زور دیا گیا ہے جیسے کہ ڈرائیونگ کے دوران موبائل فون استعمال کرنے سے گریز کرنا، ڈرائیونگ کے محفوظ طریقوں پر عمل کرنا، تجویز کردہ رفتار کی حد کا مشاہدہ کرنا، اور اوور لوڈنگ سے گریز کرنا شامل ہیں۔ شرکاء کو گاڑیوں میں حفاظتی آلات کے استعمال کی اہمیت کے بارے میں بھی آگاہ کیا گیا تاکہ روڈ سیفٹی کو بہتر بنایا جا سکے اس کے علاوہ ڈرائیوروں اور مالکان کے لیے آلودگی کے سرٹیفکیٹ اور ضروری دستاویزات کو یقینی بنایا جائے۔ محکمہ موٹر وہیکل کشتواڑ عوام میں ذمہ دارانہ اور محفوظ ڈرائیونگ کے کلچر کو فروغ دینے کے لیے پْرعزم ہے۔ اس طرح کے اقدامات سڑک حادثات کو کم کرنے اور تمام سڑک استعمال کرنے والوں کی فلاح و بہبود کو فروغ دینے کے وسیع مقصد میں اہم کردار ادا کرتے ہیں۔
