کہابی جے پی نے حال ہی میں ختم ہونے والے پارلیمانی انتخابات میں اطمینان بخش کامیابی حاصل کی ہے
لازوال ڈیسک
جموں؍؍بھارتیہ جنتا پارٹی جموں و کشمیر کے صدر رویندر رینا نے کہا کہ بی جے پی جموں و کشمیر کے لوگوں کی لوک سبھا انتخابات میں ان کی حمایت کے لئے بے حد مشکور ہے۔اس موقع پرسابق نائب وزرائے اعلیٰ ڈاکٹر نرمل سنگھ اور کویندر گپتا، جنرل سکریٹریز ایڈوکیٹ وبود ھ گپتا ، ڈاکٹر دیویندر کمار منیال اور ترجمان اعلیٰ ایڈوکیٹ سنیل سیٹھی نے پارٹی ہیڈکوارٹر، تریکوٹہ نگر، جموں میں میڈیا کے نمائندوں سے تبادلہ خیال کیا۔وہیںرویندر رینا نے میڈیا کے نمائندوں سے تبادلہ خیال کرتے ہوئے کہا کہ بی جے پی نے حال ہی میں ختم ہونے والے پارلیمانی انتخابات میں اطمینان بخش کامیابی حاصل کی ہے۔ انہوں نے کہا کہ ڈاکٹر جتیندر سنگھ اور جگل کشور شرما نے اپنے اپنے حلقوں میں لگاتار تیسری جیت حاصل کی۔ انہوں نے کہا کہ بی جے پی جموں و کشمیر کے باشندوں کی غیر مشروط محبت اور حمایت کے لئے شکریہ ادا کرتی ہے جس کے نتیجے میں یہ فتح ملی۔
رینا نے کہا کہ بی جے پی کو دونوں پارلیمانی حلقوں کے ووٹروں کی زبردست حمایت حاصل ہوئی جس کی وجہ سے اس جیت میں اضافہ ہوا۔ انہوں نے اس حمایت کے لیے بزرگ شہریوں، پہلی بار ووٹ دینے والوں، خواتین اور ووٹروں کے تمام طبقات کا بھی شکریہ ادا کیا۔بی جے پی صدر نے اننت ناگ، راجوری، پونچھ، بارہمولہ، کولگام اور دیگر تمام علاقوں کے باشندوں کا بھی شکریہ ادا کیا، جہاں پارٹی کو لوگوں کی حمایت حاصل ہوئی۔رینا نے مزید کہا کہ بی جے پی کو کشمیر کے علاقے سے بڑے پیمانے پر حمایت حاصل ہوئی ہے اور اس نے ایک مضبوط بنیاد کی طرف مارچ کیا ہے اور امید ظاہر کی ہے کہ وہ دن دور نہیں جب بی جے پی کشمیر کے علاقے میں پارلیمنٹ اور اسمبلی کی نشستیں جیت لے گی۔
رویندر رینا نے ایک بار پھر جموں و کشمیر کے لوگوں کا پورے مرکز کے زیر انتظام علاقے میں پارٹی کی حمایت کرنے پر شکریہ ادا کیا۔ انہوں نے کہا کہ بی جے پی نے ’’سب کا ساتھ، سب کا وکاس، سب کا وشواس‘‘ کے اصول کے ساتھ کام کیا ہے اور خدمت کے اس اصول کو جموں و کشمیر میں پارلیمانی انتخابات میں ووٹنگ میں اضافہ سے منسوب کیا ہے۔انہوں نے الیکشن کمیشن کے اہلکاروں اور سیکورٹی فورسز کا شکریہ ادا کیا جنہوں نے انتخابی عمل کے کامیاب اور پرامن اختتام کو یقینی بنانے کے لیے خود کو وقف کیا۔انہوں نے یاد دلایا کہ پہلے وادی میں بند کیلنڈر جاری کیا جاتاتھا، جموں سے کشمیر جانے والی بسوں کو متعدد مقامات پر چیک کیا گیا تھا، بم دھماکوں کا مسلسل خدشہ تھا، لیکن آج وہاں ترقی نظر آرہی ہے، پی ایم مودی کی کوششوں سے سیاحوں کی آمد میں اضافہ ہوا ہے۔
انہوں نے جموں و کشمیر کے دیگر 3 منتخب ممبران پارلیمنٹ کو بھی لوک سبھا انتخابات میں کامیابی پر مبارکباد دی اور کہا کہ لوگوں نے اپنے ووٹ کی طاقت سے اس الیکشن میں کئی بڑے لیڈروں کو مات دی ہے ۔رینا نے کہا کہ آئندہ اسمبلی انتخابات، پنچایت اور شہری بلدیاتی انتخابات میں ایک ایماندار اور قوم پرست قیادت جیت کر سامنے آئے گی۔ انہوں نے کہا کہ زہر اور تقسیم کی سیاست کا پرچار کرنے والوں کو عوام نے آئینہ دکھا دیا ہے۔
