کہامذہبی دوروں پر رجسٹریشن کے نام پر وصولی مغل حکومت کے جزیہ ٹیکس کی یادیں تازہ کر واتی ہے
لازوال ڈیسک
جموں// شیو سینا (یو بی ٹی) جموں و کشمیر یونٹ کے رہنماؤں نے آج یہاں جموں و کشمیر کے لیفٹیننٹ گورنر کو اپنے خون سے ایک میمورنڈم لکھا اور ملاقات کے لیے وقت کی درخواست کی، جس میں سالانہ شری امرناتھ یاترا 2024 کے لیے مفت رجسٹریشن کا مطالبہ کیا گیا، جو 29 جون سے 19 اگست تک جاری رہیں گے۔وہیں جموں پریس کلب میں آج منعقدہ ایک پروگرام میں ریاستی سربراہ منیش ساہنی سمیت پارٹی کے کئی سینئر لیڈروں نے اپنے خون سے جموں و کشمیر کے لیفٹیننٹ گورنر (جو شری امرناتھ شرائن بورڈ کے چیئرمین بھی ہیں) کو رجسٹریشن کا نظام بنانے کے لیے ایک میمورنڈم لکھا۔پارٹی کے ریاستی سربراہ منیش ساہنی نے کہا کہ مذہبی دوروں پر رجسٹریشن کے نام پر وصولی مغل حکومت کے جزیہ ٹیکس کی یادیں تازہ کرتی ہے۔ انہوں نے کہا کہ امرناتھ یاترا پر آنے والے شر دھالوںکی جیبیں ان کے لیے طے شدہ رسموں سے پہلے ہی خالی ہو جاتی ہیں۔ اس پر رجسٹریشن کے نام پر فی مسافر 150 روپے وصول کیے جا رہے ہیں۔
ساہنی نے کہا کہ ہندو اکثریتی ملک میں ہندوؤں کی مذہبی یاترا پر رجسٹریشن کے نام پر رقم کی وصولی سے کسی کا سر شرم سے جھک جاتا ہے جسے کسی صورت برداشت نہیں کیا جا سکتا۔ انہوں نے کہا کہ جموں و کشمیر کی تنظیم نو سے پہلے یعنی 2019 سے پہلے، رجسٹریشن فیس صرف 50 روپے فی مسافر تھی۔ جسے بی جے پی کے دور حکومت میں لگاتار بڑھایا گیا اور 2023 میں 220روپے کر دیا۔ شیو سینا ،یو بی ٹی کے مسلسل احتجاج کے بعد 2024 میں اس میں معمولی کمی کی گئی ہے، لیکن ان کا مطالبہ ہے کہ اسے مکمل طور پر مفت کیا جائے۔وہیںساہنی نے کہا کہ ان کی لڑائی اس وقت تک جاری رہے گی جب تک شری امرناتھ یاترا کا رجسٹریشن مفت نہیں کیا جاتا۔وہیںمیمورنڈم کے ساتھ شیوسینکوں نے اپنے خون سے جموں و کشمیر کے لیفٹیننٹ گورنر سے ملاقات کے لیے ایک درخواست خط بھی لکھا۔انہوں نے کہا کہ اس سے قبل درجنوں درخواستیں دینے کے باوجود انہیں وقت نہیں دیا جا رہا۔ اس موقع پر جنرل سکریٹری وکاس بخشی، نائب صدر بلونت سنگھ، صدر کامگھر ونگ راج سنگھ موجود تھے۔
