تمام مغل بدکار یا برے نہیں تھے اکبر اور شاہجہاں نے فن اور ترقی کے شعبے میں اپنا حصہ ڈالا ہے
لازوال ڈیسک
جموں؍؍یوتھ نیشنلسٹ کانگریس پارٹی (این سی پی) کی ایک میٹنگ انجینئرریشی کلم کے قومی ترجمان اور نیشنل سکریٹری یوتھ کی صدارت میں منعقد ہوئی جس میں جے کے یو ٹی کے تمام موجودہ منظر نامے بالخصوص JKUT میں معاشی اور سیاسی پیش رفت پر تبادلہ خیال کیا گیا۔خاص طور پر نوجوانوں کو بااختیار بنانے سے متعلق چند اہم امور پر گفتگو کرتے ہوئے ارشی نے کہا کہ ملک کی موجودہ حکمران جماعت معاشی ترقی اور قوم کی خوشحالی کے لیے سنجیدہ نہیں ہے۔وہ زیادہ تر شہروں، گلیوں اور تاریخی اہمیت کے حامل مقامات اور ملک کے ورثے کے نام بدل کر لوگوں کی توجہ ہٹا رہے ہیں۔انجینئرریشی کلم نے کہا کہ موجودہ حکومت تاج محل اور دیگر تاریخی مقامات اور سڑکوں کے پرانے نام کو تبدیل کرنے کے لیے کافی پرعزم ہے۔انجینئرریشی کلم نے مزید کہا کہ تاریخ ہمیشہ دہرائی جاتی ہے اور حکام پر زور دیا کہ وہ طالب علموں کے نصاب سے اہم ابواب کو ناقص ہونے کی وجہ سے حذف نہ کریں۔ہمارے نوجوانوں کو خاص طور پر ہماری قوم کے سابقہ تاریخی حقائق کو جاننا چاہیے۔انہیں معلوم ہونا چاہیے کہ آزادی کے بعد ہندوستان کی دوبارہ دریافت کیسے ہوئی اور ہمارے عظیم کارکنوں اور رہنماؤں نے آزادی کے حصول کے لیے اپنی جانوں کا نذرانہ کس طرح دیا ہے۔انجینئرریشی کلم نے مزید کہا کہ ہم چاہتے ہیں کہ حکمران جماعت بی جے پی ہمارے سابقہ تاریخی حقائق سے سبق سیکھے اور ہندوستان کی تعمیر نو کیسے ہوئی۔انجینئرریشی کلم نے بی جے پی حکومت پر زور دیا کہ مغلوں یا کسی اور کے نام تبدیل کرنے سے ہمیں ترقی یا خوشحالی نہیں ملے گی۔تمام مغل بدکار یا برے نہیں تھے۔اکبر اور شاہجہاں نے فن اور ترقی کے شعبے میں اپنا حصہ ڈالا ہے۔اس دوران :انجینئرریشی کلم نے کہا کہ سیکولرازم اور ترقی پر توجہ دینا ملک کو خوشحالی کی طرف لے جاتا ہے۔
