میراں صاحب اور رانی باغ کے علاقے کے لوگوں نے توی پل بند کرنے کے اعلان کی حمایت کر دی
لازوال ڈیسک
جموں؍؍ میراں صاحب اور رانی باغ علاقوں کے لوگوں نے سنیچر کو سینئر سماجی کارکن امیت کپور کی جانب سے اسمارٹ میٹرز کی تنصیب کے خلاف 16 اگست کو توی پل کو بند کرنے کے اعلان کی بھی حمایت کی۔ دوسری جانب ہفتہ کو ان علاقوں کے لوگوں کی بڑی تعداد نے امیت کپور کی قیادت میں ایئرپورٹ روڈ پر اسمارٹ میٹر کے خلاف مظاہرہ کیا۔امیت کپور کی طرف سے 16 اگست کو توی پل کو بند کرنے کے اعلان کو جموں میں زندگی کے مختلف شعبوں سے تعلق رکھنے والے لوگوں اور تنظیموں کی حمایت حاصل ہو رہی ہے۔ اس کے ساتھ ہی لوگ سمارٹ میٹر کے خلاف مسلسل سڑکوں پر احتجاج کر رہے ہیں۔ اس سلسلے میں آج رانی باغ اور میراں صاحب کے لوگوں نے ائیرپورٹ روڈ پر شدید احتجاج کیا اور سمارٹ میٹرز اور حکومت کے خلاف شدید نعرے بازی کی۔ اس دوران ان علاقوں کے لوگوں نے اعلان کیا کہ وہ 16 اگست کو توی پل بند کرنے کی کال کی مکمل حمایت کریں گے اور بڑی تعداد میں لوگ بسوں اور میٹاڈور میں وہاں پہنچیں گے۔
