ا
آپ کاہرووٹ جمہوریت اور آئین کی بھی حفاظت کرے گا:راہل گاندھی
یواین آئی
نئی دہلی؍؍کانگریس کی پارلیمانی پارٹی کی لیڈر سونیا گاندھی، پارٹی کے سابق صدر راہل گاندھی اور جنرل سکریٹری پرینکا گاندھی واڈرا نے آج ووٹ دیا اور نفرت اور جھوٹ کی سیاست کو ختم کرنے کے لئے انڈیا الائنس کو ووٹ دینے کی اپیل کی۔اپنا ووٹ ڈالنے کے بعد، مسٹرگاندھی نے ووٹنگ کا نشان دکھاتے ہوئے اپنی ماں کے ساتھ سیلفی لی اور ہم وطنوں سے ووٹ ڈالنے کی اپیل کی اور کہا، ’’ماں اور میں نے ووٹ دے کر جمہوریت کے اس عظیم تہوار میں اپنا تعاون کیا، آپ سب بھی بڑی تعداد میں گھروں سے باہر نکلئے اور اپنے حقوق اور اپنے خاندان کے مستقبل کے لیے ووٹ دیجئے۔‘‘
انہوں نے مزید کہا کہ ووٹنگ کے پہلے پانچ مرحلوں میں آپ نے جھوٹ، نفرت اور پروپیگنڈے کو مسترد کیا ہے اور اپنی زندگی سے جڑے بنیادی مسائل کو ترجیح دی ہے۔ آج ووٹنگ کا چھٹا مرحلہ ہے اور آپ کا ہر ووٹ اس بات کو یقینی بنائے گا۔ نوجوانوں کو 30 لاکھ خالی سرکاری اسامیوں پر بھرتی کرنے اور ایک لاکھ روپے سالانہ کی پہلی ملازمت کی گارنٹی اسکیم شروع کی جائے۔
مسٹر گاندھی نے کہا، ’’اگر آپ چاہتے ہیں کہ غریب خاندانوں کی خواتین کے کھاتوں میں 8500 روپے ماہانہ آنے لگے ، کسانوں کو قرضوں سے آزادی ملے اور انہیں ان کی فصلوں کے لیے صحیح ایم ایس پی ملنا چاہیے، مزدوروں کو 400 روپے یومیہ اجرت ملنی چاہیے تو پھر انڈیا الائنس کو ووٹ دیں ۔آپ کا ووٹ نہ صرف آپ کی زندگی کو بہتر بنائے گا بلکہ جمہوریت اور آئین کی بھی حفاظت کرے گا‘‘۔
شاید یہ پہلا موقع ہے جب گاندھی خاندان کو کانگریس کو نہیں بلکہ کسی اور پارٹی کے امیدوار کو ووٹ دینا پڑا۔ انڈیا گروپ کے ساتھ ایک معاہدے کے تحت نئی دہلی کی سیٹ عام آدمی پارٹی (اے اے پی) کے پاس گئی ہے۔ آپ اور کانگریس کے ساتھ سیٹ شیئرنگ کے ایک حصے کے طور پرآپ نے مشرقی دہلی سے کلدیپ کمار، مغربی دہلی سے مہابل مشرا، نئی دہلی سے سومناتھ بھارتی اور جنوبی دہلی سے سہی رام پہلوان کو میدان میں اتارا ہے۔ کانگریس نے چاندنی چوک سے جے پی اگروال، شمال مشرقی دہلی سے کنہیا کمار اور شمال مغربی دہلی سے ادت راج کو امیدوار بنایا ہے۔
