ڈھاکہ، // سعودی عرب کے شہر جدہ میں اسلام میں خواتین کا مقام اور انہیں بااختیار بنانے کے موضوع سے متعلق بین الاقوامی کانفرنس میں شرکت کے لیے اتوار کی صبح بنگلہ دیش کی وزیر اعظم شیخ حسینہ ڈھاکہ سے سعودی عرب کے لئےروانہ ہوئیں۔
سعودی عرب اسلامی تعاون تنظیم (او آئی سی) کے سیکرٹری جنرل کے تعاون سے 6 سے 8 نومبر تک کانفرنس کی میزبانی کرے گا۔
وزیر اعظم اور ان کے ساتھیوں کو لے کر بیمان بنگلہ دیش ایئر لائنز کی کمرشل پرواز نے صبح 9:10 بجے حضرت شاہ جلال انٹرنیشنل ایئرپورٹ سے اڑان بھری۔وہ مقامی وقت کے مطابق دوپہر ڈیڑھ بجے کے قریب مدینہ کے پرنس محمد بن عبدالعزیز بین الاقوامی ہوائی اڈے پر پہنچیں گی۔ محترمہ شیخ حسینہ مدینہ سے جدہ کے لیے روانہ ہوں گی اور پھر مکہ مکرمہ میں عمرہ ادا کریں گی۔
علاوہ ازیں محترمہ شیخ حسینہ خواتین اور خاندانی امور کے شعبہ کی ایرانی نائب چیئرمین انسیہ خزالی، او آئی سی خواتین کی ترقی کی تنظیم کی ایگزیکٹو ڈائریکٹر ڈاکٹر افنان الشعیبی اور سعودی وزیر خارجہ شہزادہ فیصل بن فرحان سے الگ الگ میٹنگیں کریں گی۔
وزیر اعظم پیر کو اسلام میں خواتین پر بین الاقوامی کانفرنس کی افتتاحی تقریب میں شرکت کریں گی اور مہمان خصوصی کی حیثیت سے اپنا خطاب پیش کریں گی۔ وزیراعظم منگل کے روز مسجد الحرام میں نماز ادا کریں گی۔
