یہکتابیں طلباء کے مطالعے میں نمایاں مدد کریں گی اور ان کی تعلیمی کامیابی میں اہم کردار ادا کریں گی:مصنفین
لازوال ڈیسک
جموں؍؍جی جی ایم سائنس کالج جموں کے پرنسپل ڈاکٹر راجیش گپتا نے کیمسٹری ڈیپارٹمنٹ کے فیکلٹی کی موجودگی میں آج ڈاکٹر عاشق حسین ،ڈاکٹر مختیار سنگھ سینی اور ڈاکٹر سکھدیپ سنگھ ساسن پر مشتمل شعبہ کیمسٹری کے فیکلٹی ممبران کے ایک گروپ کی تصنیف کردہ تین کتابوں کا اجراء کیا۔ وہیںتفصیلات بتاتے ہوئے کتابوں کے بنیادی مصنف ڈاکٹر عاشق حسین نے قومی تعلیمی پالیسی2020 کے نفاذ سے ہونے والی تبدیلیوں کی روشنی میں ان کی اہمیت پر زور دیتے ہوئے کتابوں کے بارے میں بصیرت کا اظہار کیا۔انہوں نے کہا کہ کتابوں کا مقصد ان چیلنجوں سے نمٹنے کے لیے جدید اور جامع مطالعاتی مواد فراہم کرنا، اساتذہ اور طلبہ دونوں کے لیے قابل قدر حوالہ جات کے طور پر کام کرنا، موثر اور کامیاب تعلیمی سفر میں سہولت فراہم کرنا ہے۔ ڈاکٹر عاشق نے مزید کہا کہ کتابوں کے مواد کو مختلف یونیورسٹیوں کی طرف سے تجویز کردہ نصاب کے مطابق نہایت احتیاط سے تیار کیا گیا ہے، جس سے طلباء کی ضروریات کے مطابق مطابقت اور اطلاق کو یقینی بنایا گیا ہے۔
وہیںکتابوں کے ایک اور مصنف ڈاکٹر ایم ایس سینی نے مصنفین کے کام کو تسلیم کرنے پر پرنسپل کا شکریہ ادا کیا۔ انہوں نے طلباء کو ان کتابوں کے ممکنہ فوائد پر زور دیتے ہوئے کہا کہ یہ ان کے مطالعے میں نمایاں مدد کریں گی اور ان کی تعلیمی کامیابی میں اہم کردار ادا کریں گی۔ انہوں نے ان کتابوں کے کردار پر مزید زور دیا کہ وہ طلباء اور اساتذہ کو تعلیمی منظر نامے کو بدلتے ہوئے تعلیمی تقاضوں سے ہم آہنگ کرنے میں معاونت فراہم کرتے ہیں۔
اس موقع پرکتابوں کے مصنفین کو مبارکباد دیتے ہوئے، ڈاکٹر راجیش گپتا، پرنسپل جی جی ایم سائنس کالج نے کہا کہ یہ کتابیں قومی تعلیمی پالیسی 2020 کے مقرر کردہ اہداف کے مطابق، فیکلٹی اور طلباء دونوں کے لیے تعلیمی تجربے کو بڑھانے کے لیے مصنفین کی قابل ستائش کوششوں کی نشاندہی کرتی ہیں۔ ڈاکٹر گپتا نے مزید زور دیا کہ یہ تعاون نہ صرف مصنفین کے پروفائلز کو بہتر بنائے گا بلکہ کالج کے مجموعی پروفائل پر بھی مثبت اثر ڈالے گا۔
